İstismar müddəti bitmiş binalarla bağlı təklif – “Xüsusi lövhələr vurulsun...”
15:22 / 06.05.2021
2290
Ötən gün Bakıda binanın fasadından qopan daşın
üzərinə düşməsi nəticəsində 14 yaşlı Əli Şabanov xəstəxanada vəfat edib.
Bu hadisədən sonra əksəriyyət istər-istəməz
binaların, xüsusilə köhnə tikililərin yanından keçərkən ehtiyatlı olmağa
çalışır.
Maraqlıdır, bu istiqamətdə hansı təhlükəsizlik
tədbirləri görülməlidir?
Mövzu ilə bağlı təhlükəsizlik üzrə ekspert
Elmar Nurəliyev Sfera.az-a açıqlamasında deyib ki, Bakıda 10 mindən çox çoxmənzilli yaşayış
binaları mövcuddur və hərəsinin öz istismar müddəti var:
"Binaların istismar müddəti onların yerləşdiyi
ərazinin iqlimindən, geoloji vəziyyətindən, torpağın qum, gil, çınqıl və s.
olmasından, binanın layihəsindən və tikinti zamanı istifadə olunan tikinti
materialların növündən və keyfiyyətindən aslıdır. Daha sonra isə müəyyən
edilmiş vaxtlarda texniki xidmətlər, cari və əsaslı təmirlər üçün vaxtlar nəzərdə
tutulur. Bu vaxtlar binanın mövcud vəziyyətinə, qəzalı və təhlükə riskli olmasına
görə də dəyişə bilər.
Bu amillər nəzərə alınaraq binalara istismar
müddəti təyin edilir. Binalara vaxtında texniki qulluq göstərilməsə, dam
örtüyünün vaxtında dəyişilməməsi, binanın fasadının boyasını və üzlüyünün
aşınmaya məruz qalması, su və kanalizasiya sistemlərinin, istilik sistemlərinin
istismar müddətini başa vurduqda dəyişilməməsi, binaya kənar müdaxilələrin yəni,
layihə konstruksiyasında dəyişikliyin edilməsi ilə eyvan, məhəccərdə, otaqların
arasını açmaq və s. kimi amillərə yol verilməsi ilə binanın vaxtından tez
istismar müddətini başa vurmasına gətirib çıxardır. Ona görə bu məsələrələ daha
həsas yanaşmaq lazımdır”.
Müsahibimizin sözlərinə görə, çoxmənzilli
binalarda 10-larla, 100-lərlə ailə yaşadığını nəzərə almaq lazımdır: "Hər hansı qəza, bədbəxt hadisə çox sayda
insanların həyatı üçün təhlükəli ola bilər. Əgər bina qəzalı vəziyyətdirsə,
insanların həyat və sağlamlığı üçün təhlükə yarada biləcək durumdadırsa və hələ
ki sökülməsi uzanırsa, heç olmasa ən azından həmin yerə xəbərdarlıq üçün lövhələr
vurula, təhlükəli ərazidən keçidlər məhdudlaşdırıla, həmçinin insanların hərəkət
etdiyi yer boyunca qoruyucu keçid quraşdırıla bilər. Belə halda yuxardan aşağı
hər hansı metal konstruksiya, daş və digər bərk material aşağı düşərsə, həmin
keçidin üstünə düşsün, insanlara xəsarət yetirməsin”.
