DİM qızdırması olan abituriyentləri imtahana buraxmır, düzgündürmü? – Ekspertdən etiraz
17:03 / 16.04.2021
2961
Ötən gün Dövlət İmtahan Mərkəzi tam orta təhsil
bazasında (11 illik) buraxılış imtahanları keçirib. 2 nəfərin bədən hərarəti
normadan yüksək olduğu üçün təcili tibbi yardım üzrə həkimin rəyinə uyğun
olaraq imtahana buraxılmayıb.
Pandemiya ilə əlaqədar elə ötən il də eyni vəziyyət
müşahidə olundu. Yəni, buraxılış və qəbul imtahanlarında hərarəti 37 dərəcə
olan onlarla şagird və abituriyent müsabiqədən kənarda qaldı. Həmin şəxslərin
bir il itirdiyini desək, yanılmarıq.
Təhsil eksperti Elvin Bədirov problemlə bağlı
Sfera.az-a açıqlamasında bildirib ki, buraxılış imtahanları ən çox tənzimlənmə
tələb edən imtahandır: "Müxtəlif zamanlarda müxtəlif suallardan təşkil
edilmiş çoxsaylı imtahanlarla şagirdləri eyni bir müsabiqə üçün imtahan etmək
ümumiyyətlə məqbul sayıla bilməz.
Pandemiya dövründə maksimum çalışmaq lazımdır ki, abituriyentlərin
imtahanlarda iştirakı tam təmin edilsin.
Ekspert bildirib ki, Dövlət İmtahan Mərkəzi üçün bunu etmək heç də çətin olmamalıdır: "Yetər ki, təşəbbüs göstərilsin. Abituriyentlərin bütün il ərzində çəkdiyi əziyyətlər bu qədər sıradan səbəbdən boşa getməməli, onlar əlavə psixoloji travma yaşamamalıdırlar”.
Günay Rəsulqızı
