Xüsusi karantin miqrantlara nə kimi problemlər yaradır? - Azər Allahverənovdan açıqlama
15:24 / 13.04.2021
1009
"Bir ildən çoxdur davam edən pandemiya şəraiti
miqrasiya sahəsinə də təsirsiz ötüşməyib. Dövlətlərarası miqrasiya mübadiləsində durğunluq müşahidə
edilir”.
Bunu
Sfera.az-a açıqlamasında Dövlət Miqrasiya Xidməti yanında İctimai Şuranın sədri
Azər Allahverənov xaricdə işləyən miqrantlardan danışarkən bildirib. Onun sözlərinə
görə, karantin rejiminin mövcud olduğu yerlərdə dövlətlərarası sərhədlərdə müəyyən
məhdudiyyətlər tətbiq olunur, hətta bəzi hallarda sərhədlər tamamilə qapadılır:
"Eynilə Azərbaycanla
həmsərhəd olan dövlətlər arasında quru sərhədlər üzərində xüsusi karantin
rejimi mövcuddur. Bu da ölkələrarası miqrasiya mübadiləsinə mənfi təsir göstərir.
Vaxt var idi, məsələn, Rusiya Federasiyasında yaşayan azərbaycanlıların sayı təxminən
600 min civarında idi. Amma pandemiya səbəbilə bir çox iş yerlərinin
bağlanması, iri layihələrin dayandırılması miqrantların sayına təsir etdi. Bu
baxımdan 2020-ci ildə Rusiyada yaşayan azərbaycanlıların sayı 350 min civarında
olub. Eynilə bu vəziyyət digər ölkələrdə də müşahidə edilir”.
Müsahibimiz
həmin ölkələrdə yaşayan miqrantların hansı çətinliklərlə üzləşdiklərindən də
söz açıb: "Sərhədlərin
bağlanması heç də hər zaman miqrantın öz ölkəsinə qayıtmasına imkan vermir. Nəticə
etibarilə həmin ölkədə qalan miqrant istər-istəməz çox çətin vəziyyətə düşür.
Birincisi, iqtisadi cəhətdən maddi sıxıntılar yaşamaq məcburiyyətində qalırlar.
Çünki iş yerləri bağlıdır və öz ölkəsinə qayıda bilmir. Maddi sıxıntı olduğu
halda, digər problemlərlə də üz-üzə qala bilirlər. Bu səbəbdən bir çox ölkələr
bu və ya digər formada miqrantlar, onların ailələri üçün müəyyən dəstək
proqramı həyata keçirirlər. Bəllidir ki, hamısını əhatə etmək mümkün olmur.
Daha çox risk qrupuna aid edilənlərə bu kimi dəstəklər göstərilir”.
A.Allahverənov
qeyd edib ki, pandemiyaya görə ölkə ərazisində qalan miqrantlar hansısa
qeyri-qanuni müstəvilərə və ya hərəkətlərə səbəb ola bilirlər: "Pandemiyadan əziyyət
çəkən miqrantlar həm də risk qrupuna aiddirlər. Onlar müxtəlif mütəşəkkil cinayət
qruplarının toruna düşə və ya onlardan müxtəlif məqsədlər üçün istifadə oluna
bilər. Avropanın bir çox dövlətlərində xüsusilə bununla bağlı çox ciddi mübarizə
həyata keçirilir. Şəxs əgər ölkə ərazisində qanuni əsaslarla yaşayırsa və sonra
müəyyən səbəblər ucbatından qeyri-qanuni müstəviyə düşürsə, o artıq risk
qrupuna aid olunur.
Günay Rəsulqızı
