4 nəfərə 2 stul qalmaqalı - Türkiyə XİN insidentlə bağlı xüsusi açıqlama yaydı + VİDEO
14:24 / 08.04.2021
1082
Ankarada keçirilən görüş zamanı iki stul və
dörd siyasətçi ilə bağlı qəribə insident yaşanıb. Sözügedən görüş aprelin 6-da
baş tutub, amma hələ də KİV-nin diqqət mərkəzindədir.
Sfera.az xatırladır ki, Avropa Komissiyasının
rəhbəri Ursula fon der Leyen və Avropa Şurasının prezidenti Çarlz Mişel
Ankaraya səfər etmişdi. Onları Türkiyə lideri Tayyib Ərdoğan, eləcə də Türkiyənin
xarici işlər naziri Mövlud Çavuşoğlu qarşılayıb. Qonaqlar öz yerlərinə keçənədək
hər şey yaxşı gedirmiş.
Amma nədənsə otağa yalnız iki stul qoyulmuşdu,
bu üzdən fon der Leyen divanda oturmalı olub.
Nəticədə diplomatik protokola görə ondan daha aşağı rütbədə olan
Çavuşoğlu ilə üz-üzə əyləşmək məcburiyyətində qalıb.
"Bu mövzuda hər hansı bir açıqlama vermək istəmirdik,
amma gördük ki, xaricdə bu olay əks-sədaya
səbəb olub və Türkiyənin ünvanına haqsız ittihamlar səsləndirilir. Xarici
qonaqları ilk dəfə qəbul etmirik, ənənəvi türk qonaqpərvərliyi isə bütün
dünyaya məlumdur. Bu görüşdə də hər şey qəbul edilmiş beynəlxalq qaydalara və
adi protokola uyğun idi. istənilən görüşdən əvvəl hər iki tərəfin protokol əməkdaşları
bir araya gəlib detalları dəqiqləşdirir”,- deyə Çavuşoğlu Ankarada jurnalistlərə bildirib.
Bununla belə Avropa Birliyində yaranmış situasiya fon Leyenə hörmətsizlik
kimi qarşılanaraq kəskin tənqid olunub.
Selcan
Sfera.az
