Azərbaycanlı milyarderlər niyə Qarabağın bərpasına pul xərcləmir?

"Milli hisslərin zəif olması və yaşadıqları ölkələrdə yerli strukturlardan asılı olmalarından irəli gəlir”. 

 

Bu sözləri Sfera.az-a açıqlamasında dünyanın müxtəlif ölkələrində yaşayan azərbaycanlı imkanlı şəxslərin mütləq əksəriyyətinin Qarabağın bərpası və qazi, şəhid ailələrinə yardım məsələlərində aktivlik  nümayiş etdirməmələrinə münasibət bildirərkən sosioloq Əhməd Qəşəmoğlu deyib:  

 

"Azərbaycanlı miyarderlər, imkanlı insanlarımız tək müharibədən sonra yox, ondan əvvəl də xeyriyyə işlərində erməni və yəhudilərə nisbətən fərqli davranış nümayiş etdirdilər.  Bu əsasda belə qənaətə gəlmişəm ki,  ermənilər arasında milli hissləri güclü olanlara kömək olunub  və onlar irəli çıxaraq bu və ya digər imkanlara sahib olublar. Məhz diaspora və  ölkə daxilində onlara kömək edilməsinin nəticəsidir ki, ermənilər arasında zəngin olanlar sırasında milli hissi güclü olanlar çoxluq təşkil edir. Ermənkistanda onları heç kim qınamır, heç kəs təzyiq göstərmir”.

Sosioloqun fikrincə,  milyarder soydaşlarımız arasında milli hisslər zəifdir:  "Rusiyada yaşayan zənginlərimiz Qarabağın bərpası prosesinə yardım etməklə erməni təəssübkeşlərinin onlardan incik düşəcəyindən, maneə olacaqlarından ehtiyat edirlər. Çünki bilirlər ki, Rusiya  ermənilərin təəssübünü çəkir.  Həmçinin, milyoner olan soydaşlarımızın mütləq əksəriyyəti  heç də milli hisslər baxımından bu səviyyəyə gəlib çatmayıb. Yalnız yaşadıqları ölkədə yerli strukturlarla güclü əlaqələri sayəsində bu imkanı əldə ediblər.

 

 

Elçin