“Qazilərimizə əlililik dərəcəsinin verilməsində böyük ədalətsizlik var” – Natiq Miri

Bu sözləri Sfera.az-a açıqlamasında Şəhid adının əbədiləşdirilməsi və Şəhid ailələrinə daha hansı güzəştlərin edilməsi vacibliyindən danışarkən, politoloq Natiq Miri deyib:

 

Vətən müharibəsindən sonra şəhid ailələri, Qazilər arasında və cəmiyyətdə narazılıq yaradan bir çox çatışmamazlıq və sistemsizlik ortalığa çıxdı ki, bu günün özündə də həmin problemlər qalmaqdadır.  Şəhid ailələri və Qazilərimizlə bağlı qanunvericilikdə olan bütün boşluqlar aradan götürülməli və bu məsələdə ortalığa sistemli yanaşma tərzi qoyulmalıdır.  Bu məsələ ilk növbədə Müdafiə Nazirliyinə aiddir. Məsələyə adekvat yanaşmamaq, süründürməçilik və hərbi hospitallarda Qazilərimizin müalicəsinə yanaşma tərzində ögeyliliyi təəssüf ki, müşahidə edirik”.

Həmsöhbətimiz qeyd edib ki,  qazilərimizin müalicə alması üçün xüsusi mexanizmlərin yaradılmasına ehtiyac var: "Şəhid və Qazi ailələrinə yardım məsələsi də elə bir sistemə oturulmalıdır ki, bu ailələr zərrə qədər də olsa dövlətdən inciməsin. Bu ailələr mütəmadi olaraq dövlətin diqqətində olmalıdır.  Bu gün qazilərimizin müalicə almaları üçün xüsusi mexanizmlər yaradılımalıdır.  Bu istiqamətdə müəyyən addımlar atılsa da, yetərli deyil.  Həmin məsələ xüsusən də Müdafiə Nazirliyi, Əmək və Əhalinin Sosial Müdafiə Nazirliyi və Səhiyyə Nazirliyinin diqqətində olmalıdır. Bunun üçün də Səhiyyə və Sosial müdafiə nazirliklərində məsələlərə çevik reaksiya vermək üçün xüsusi şöbələr yaradılmalıdır. İndiki halda isə məsələyə süründürməçiliklə yanaşılır”.

 

N. Miri bildirdi ki, yaralanan qazilərimizə əlililik dərəcəsinin verilməsində böyük ədalətsizlik mövcuddur: "Bir gözünü tamamilə itirən, o biri gözünün isə cəmi 30 faizi görən qazimizə 3-cü dərəcəli əlililik verilib. Bu ədalətsizliyi cəmiyyətimiz qəbul etmir. Bütün bu boşluqlar qanunvericiliklə tənzimlənməli və ona dövlət, ictimai nəzarət olmalıdır”.