Ən çox hansı bələdiyyələrə yardım edilib? - SİYAHI
Cəmiyyət
16:33 / 01.04.2021
628
Bələdiyyələrin gəlirinin bir hissəsini hüquqi və fiziki şəxslər tərəfindən bağışlanan yardımlar təşkil edir. Bu gəlirlər bələdiyyələrin vergi olmayan gəlirlərinə aiddir.
Sfera.az bildirir ki, ötən il bələdiyyələrə verilən ianələrin ümumi məbləği 439,1 min manat olub və 2019-cu illə müqayisədə 66,8 faiz artıb.
Yerli özünüidarəetmə orqanlarına verilən yardımların 253,8 min manatı fiziki şəxslər tərəfindən, 185,3 min manatı hüquqi şəxslər tərəfindən ayrılıb. 2019-cu illə müayisədə fiziki şəxslərin yardımlarının məbləği 13,8 faiz, hüquqi şəxslərin yardımlarının məbləği 4,6 dəfə artıb.
Artımlar hesabına bələdiyyələrin gəlirlərində yardımların payı 1,2 faizə yüksəlib.
Şəhər və rayonlar üzrə qruplaşdırdıqda ən çox yardım Sumqayıt bələdiyyələrinə edilib. Sumqayıt bələdiyyələri ümumilikdə 120,6 min manat yardım alıb.
Bakı şəhərinin bələdiyyələrinə 68,5 min manat, Abşeron rayonunda yerləşən bələdiyyələrə 59,6 min manat, Gəncə şəhərində olan bələdiyyələrə 45 min manat, Qazax rayonunda olan bələdiyyələrə 42,3 min manat yardım edilib.
Digər rayon və şəhərlərdə olan bələdiyyələrdən Samux bələdiyyələri 18,3 min manat, Qusar rayonunda olan bələdiyyələr 17,9 min manat, Qax bələdiyyələri 16,9 min manat, Lənkəran şəhərində yerləşən bələdiyyələr 12,4 min manat, Salyan bələdiyyələri 10,4 min manat ianə alıb.
Vasif
Sfera.az
