Ombudsman Səbinə Əliyevanın bir illik fəaliyyəti – Siyasilərin dəyərləndirməsi

Bu sözləri Sfera.az-a açıqlamasında Azərbaycan Respublikasının İnsan Hüquqları üzrə Müvəkkili, Ombudsman Səbinə Əliyevanın bir illik fəaliyyətini dəyərləndirərkən Milli Məclisin deputatı Fazil Mustafa söyləyib:

 

"Pandemiya dövründə  bu qurum da digərləri kimi çətin şəraitdə fəaliyyət göstərib. Buna baxmayaraq, həbsxanalara baş çəkiblər,  müxtəlif beynəlxalq təşkilatlarla əlaqə qurublar.  Müharibə dövründə bir sıra dağıdılmış ərazilərə baş çəkiblər. Həmçinin insan hüquqlarının qorunması istiqamətində daha böyük işlər qarşılarına çıxıb. Bütün bunlara baxmayaraq,  Ombudsmanın fəaliyyətini qənaətbəxş hesab edirəm.  Hesab edirəm ki, çox sayda çətinliklərin öhdəsindən gələ biliblər”.

Müsavat Partiyasının başqanı Arif Hacılı hesab edir ki, Ombudsmanın fəaliyyətinə birmənalı qiymət vermək çətindir: "Azərbaycanda hüquqi nihilizm şəraiti hökm sürdüyündən ombudsmanın fəaliyyətinə birmənalı qiymət vermək çətindir. Ölkədə mövcud olan idarəçilik sistemi hər bir vəzifəli şəxs üçün müəyyən fəaliyyət çərçivəsi cızıb və bu şəxslərin həmin çərçivədən çıxmaq imkanları yoxdur”.

 

Bu açıqlama isə deputat Azər Badamova məxsusdur: "Son bir ildə ölkəmizdə  pandemiya ilə əlaqədar karantin tətbiq olunsa da, Ombudsman öz fəaliyyətini yeni formada qura bildi.  Müraciətlər daha çox  sosial şəbəkələr vasitəsilə qəbul edildi, buna şərait yaradıldı.  Ombudsman müraciət edənlərin müraciətlərinə operativ cavab verərək, operativ şəkildə də araşdırıb.  Məhkumluq həyatı yaşayanlarla da görüşüb.  44 günlük müharibə dövründə düşmənin mülki insanlarımıza vurduğu zərərləri yerindəcə öyrənərək, o insanların yanında olub.  Həmçinin, ermənilərin insanlığa qarşı törətdiyi cinayətlər barədə beynəlxalq təşkilatları məlumatlandıraraq, onlara müraciətlər edib.  Bütün bunlar onu deməyə əsas  verir ki, son 1 ildə Ombudsman qanunun verdiyi imkanlar çərçivəsində öz fəaliyyətini qura bilib”.