"Təcili bu toy, nişan qadağasına bir əncam çəkmək lazımdır, əks halda bölgə qan çanağına dönəcək" - Seymur Baycan

Sfera.az xəbər verir ki, bunu yazıçı Seymur Baycan deyib. O bildirib ki, bu dəqiqə azərbaycanlıları narahat edən ən vacib məsələ toyların qadağan olunmasıdır:

"Sabah konservatoriyanı bağlayıb yerində kababxana açsalar, beş-altı adamdan savayı heç kimin tükü də tərpənməyəcək. Necə ki, kitabxanaları bağlayıb yerində kababxanalar açanda beş-altı adamdan savayı heç kimin tükü də tərpənmədi. Bu dəqiqə azərbaycanlıları narahat edən ən vacib məsələ toyların qadağan olunmasıdır. 

Onlara şadlıq evi lazımdır. Gedib orada atlanıb-düşsünlər, qızıllarını, o iyrənc paltarlarını bir-birlərinə göstərsinlər, mahnı oynamaq üstündə dalaşsınlar, bıçaqlaşsınlar, toyda özlərinə arvad, ər tapsınlar, artsınlar, çoxalsınlar, doğub-törəsinlər… Gah orada gizli toy keçirirlər, gah burada gizli nişan keçirirlər. Adamda belə təəssürat yaranır ki, elə bir fəaliyyəti qadağan olunmuş hansısa təşkilat zirzəmidə zadda gizli tədbirlər keçirir, gizli mətbəədə vərəqələr çap edir… Nə olub? Dünyanın axırıdır?”.

Yazıçı "Toy qadağan olunub, olmaz, vəssalam” sözləri ilə fikrinə davam edib: 

Yəni bunu başa düşmək bu qədər çətindir? Yox, azərbaycanlılar toysuz qala bilməzlər. Azərbaycanlılar üçün toysuz qalmaq elə dünyanın axırı deməkdir. Çünki toy, şadlıq evi, mahnı, oynamaq üstündə dalaşmaq, bıçaqlaşmaq onların həyatının yeganə mənasıdır. Bu toy qadağası bir az da davam etsə, azərbaycanlılar hansısa ölkəyə hücum edəcəklər. Təcili bu toy, nişan qadağasına bir əncam çəkmək lazımdır. Əks halda bölgə qan çanağına dönəcək. Tam ciddiyəm, heç kim fikirlərimi absurd kimi qəbul etməsin”.