Ermənistan Baş Qərargahının keçmiş rəisi həbsdən azad edilmədi
Dünya
13:45 / 11.02.2021
743
İrəvan şəhər birinci instansiya məhkəməsi fevralın 11-də keçirilən iclasında Kollektiv Təhlükəsizlik Müqaviləsi Təşkilatının keçmiş baş katibi, Ermənistan Silahlı Qüvvələri Baş Qərargahının sabiq rəisi Yuri Xaçaturov barəsində həbs qətimkan tədbirini dəyişməyib.
Sfera.az xəbər verir ki, məlumatı "Sputnik Armeniya” yayıb.
Qeyd edək ki, general Yuri Xaçaturov 2008-ci il martın 1-də baş verən hadisələrə görə günahlandırılır.
Xatırladaq ki, 2008-ci ilin fevral ayında Ermənistanda prezident seçkisi keçirilib. O vaxt Mərkəzi Seçki Komissiyası namizədlərdən birini, hakimiyyətin dəstəklədiyi Serj Sarqsyanın 52,8 faiz səs topladığını və qalib gəldiyini elan edib. O biri namizəd - Ermənistanın ilk prezidenti Levon Ter-Petrosyan seçkidə saxtakarlıq olduğunu elan edib və nəticələri tanımayıb.
Seçkilərin nəticələrinin saxtalaşdırılmasına etiraz olaraq martın 1-2-də ölkədə etiraz aksiyaları keçirilib. Hakimiyyət mitinqin dağıdılması üçün güc tətbiq edib. Ordu və polisin açdığı atəş nəticəsində 10 nəfər ölüb, xeyli insan yaralanıb. Bu hadisələri törədənlər indiyədək cəzalandırılmayıblar.
Hadisə ilə bağlı keçmiş prezident Robert Koçaryan, keçmiş müadiə naziri Seyran Ohanyan da ittiham olunurlar.
Nikol Paşinyan Ermənistanın baş naziri olandan sonra 2008-ci ilin 1-2 mart hadisələrinə görə cinayət işi təzələnib. O vaxtkı prezident Robert Koçaryan məsələ ilə bağlı 2018-ci il iyulun 27-də həbs olunmuşdu.
Adları yuxarıda qeyd edilənlər konstitusiya quruluşunu devirmək və külli miqdarda rüşvət almaq, qanunsuz yolla əldə edilən vəsaitləri leqallaşdırmağa görə mühakimə olunurlar.
