Onlar Şuşanı belə görmək istəyir – Millət vəkillərinin təklifləri
16:53 / 28.01.2021
1310
"Şuşa qısa zamanda iqtisadi baxımdan kifayət qədər inkişaf etmiş şəhərə
çevriləcək”.
Bunu Sfera.az-a açıqlamasında bərpa işlərinin tamamlanmasından sonra Şuşa
şəhəində hansı iqtisadi, mədəni və sosial layihələrin həyata keçirilməsinin
daha vacib olduğunu vurğulayarkən Milli Məclisin deputatı Vüqar Bayramov deyib.
Onun sözlərinə görə, Şuşa bölgənin mühüm turizm mərkəzinə çevrilməlidir:
"Şuşa turizm potensialına görə Azərbaycanın, ümumiyyətlə, Cənubi Qafqazın
fərqlənən şəhərlərindəndir. Şuşa Cənubi Qafqazda turizm üzrə fərqli xidmətlər
göstə biləcək azsaylı şəhərlərdəndir. Burada yay, qış turizm imkanları
genişdir. Habelə bu şəhər tarixi, dini, mədəni, sağlamlıq turizmi imkanlarına
da malikdir. Burada fasiləsiz turizmin inkişaf etdirilməsi imkanları genişdir. Ona
görə də Şuşa üçün turizm baxımından yeni innovativ məhsulların təklifi daha məqəsədə
uyğundur”.
Deputat qeyd edib ki, şəhərin sənaye imkanları da genişdir: "Əvvəlki
dövrdə Şuşada sənaye müəssisələri olub. Bu mənada şəhər yüngül sənayenin
inkişaf etdirilməsi üçün geniş imkanlara malikdir. Yaxın dövrdə bura xarici
investisiyanın daha çox cəlb edilməsi gözlənilir. Belədə güman olunur ki, Şuşa
qısa zamanda iqtisadi baxımdan kifayət qədər inkişaf etmiş şəhərə çevriləcək”.
"Şuşada 100 minlik əhalisi olan şəhər salmaq olar”
Milli Məclisin deputatı Sabir Rüstəmxanlı ilk növbədə qədim Şuşanın
ruhunun özünə qaytarılmasını istəyir:
"Tökülən qanların nəticəsində qurulacaq Şuşa şübhəsiz ki, o qanlara layiq
və son dərəcədə gözəl olmalıdır. Allahın
verdiyi təbiət bunu həyata keçirməyə imkan yaradır. İlk növbədə köhnə, qədim
Şuşa bərpa olunmalıdır. Oradan çıxmış dahilərimizin evləri, onların xatirəsilə
bağlı yerlər bərpa edilməlidir. Vaqifin movzeleyi bərpa olunmalıdır. Habelə Üzeyir
Hacıbəyov, Əhməd Ağaoğlu, Natavanın adı ilə bağlı nə varsa, bərpa edilməlidir.
Yəni, köhnə Şuşanın ruhu qayıtmalıdır”.
Deputatın fikrincə, Şuşa böyük şəhərə çevrilməlidir:
"Şəhər Sovet dövründə tikilmiş və Şuşaya yaraşmayan binalardan təmizlənməlidir.
Buradakı sanatoriyalar, qala divarları bərpa olunmalıdır. Əhali sayı artdıqca
burada konservatoriya, ali məktəb də tikilməlidir. Tarixin bir dövründə bu balaca yerdə 50 minə
yaxın əhali yaşayıb.
Ona görə indi burada 100 minə yaxın əhali olan şəhər salmaq olar. Şəhəri
muzey, sənət məbədi, Şuşa xanlığının paytaxtı kimi saxlamaqla yanaşı, eyni
zamanda böyük Şuşanı da yaratmaq mümkündür. Yetər ki, Daşaltı və Topxana meşəsindən
qarşı tərəfə asma körpü salınsın. Bu xəyalımda cızdığım layihədir”.
Sfera.az
