Hollandiyada karantinə etiraz edənlər polislərlə toqquşub körpünü partlatdılar - FOTOLAR
11:15 / 27.01.2021
1407
Koronavirus epidemiyası səbəbindən məhdudiyyətləri sərtləşdirən Hollandiyada birdən çox şəhərdə etiraz aksiyaları başlayıb.
Sfera.az xarici mətbuata istinadən bildirir ki, paytaxt Amsterdam başda olmaqla, bir çox şəhərdə yüzlərlə insan küçələrə axışıb.
Etirazçılarla polislər arasında toqquşma baş verib. Amsterdam və Eyndhovendəki etiraz aksiyalarına polis su şırnaqları və gözyaşardıcı qazla müdaxilə edib. Ən az 30 nəfərin polis tərəfindən saxlanıldığı bildirilir. Bir qrup nümayişçi polis motosiklini yandırıb. Sosial şəbəkələrdə yayılan görüntülərdə etirazçıların hətta böyük bir körpünü partlatdığı da görünür.
Nümayişlərdə miqrant əleyhdarı olan qruplaşmanın - PEGIDA-nın tərəfdarlarının da iştirak etdiyi iddia edilir.
Etiraz aksiyalarının sürətlə digər şəhərlərə də yayıldığı ölkədə vətəndaş müharibəsi təhlükəsi getdikcə daha çox hiss olunur.
Eyndhoven şəhərinin bələdiyyə başçısı Con Coritsma, "Belə davam etsə, qorxuram ki, bu yol vətəndaş müharibəsinə gedib çıxacaq", - deyə bildirib.
Qeyd edək ki, ötən ilin dekabr ayından bəri Hollandiyada marketlər, çörəkbişirmə müəssisələri və apteklər istisna olmaqla bütün müəssisələr və məktəblər bağlıdır. Ölkədə epidemiyaya qarşı mübarizə çərçivəsində 9 fevrala qədər komendant saatı elan edilib.
Ötən həftə Hollandiyada baş tutan məhdudlaşdırma əleyhinə nümayişlərdə 143 nəfər saxlanılmışdı.
Aysel
Sfera.az
