Lavrov erməniləri niyə məyus etdi? – “Qarabağın statusu müzakirə mövzusu deyil” açıqlamasına REAKSİYA
15:35 / 18.01.2021
3161
"Bu açıqlama ondan xəbər verir ki, Dağlıq Qarabağın status məsələsini ATƏT-in Minsk qrupu müzakirə etməlidir və edəcək”.
Bunu Sfera.az-a açıqlamasında Rusiya XİN rəhbəri Sergey Lavrovun Dağlıq Qarabağın status probleminin ziddiyyətli olduğu, ona görə də həmin məsələnin 9 noyabr bəyanatına şüurlu şəkildə salınmadığı barədə fikirlərini dəyərləndirərkən politoloq İlqar Vəlizadə deyib.
İ. Vəlizadə bildirib ki, bu məsələni Minsk qrupu qaldıracaq:
"Minsk qrupunun regiona səfəri gözlənilir və onlar bu məsələni qaldıracaqlar. Yəni, Lavrov demək istəyib ki, Bakı, Moskva və İrəvandan ibarət üçtərəfli formatda status məsələsi müzakirə oluna bilməz. Xatırladım ki, həm noyabrın 9-da əldə edilən razılaşmada, həm də son danışıqlarda status məsələsi gündəmdə olmayıb. Çox güman ki, üçtərəfli formatda olacaq hər hansı gələcək görüşlərdə də status məsələsi müzakirə predmeti olmayacaq”.
Ekspertə görə, bununla Lavrov İrəvana dolayı yolla bildirir ki, sözügedən formatdan status məsələsinin müzakirəsinə ümid etməsinlər:
"Bu onu göstərir ki, Moskva status məsələsini təkbaşına olaraq Azərbaycan və Ermənistanla müzakirə etməkdən yayınır. Moskva üçtərəfli formatda maraqlarının nədən ibarət olduğunu açıq şəkildə bildirib. Maraqları ondan ibarətdir ki, kommunikasiyalar açılsın və regionda münasibətlər stabil şəkildə inkişaf etsin”.
Elçin
Sfera.az
