Xaricdə təhsil alan azərbaycanlı gənclərdə Vətənə sevgi hissi xüsusilə hiss olunur. Bu onların xaricdə olmalarına rəğmən Azərbaycana göstərdiyi diqqət və sevgidə özünü açıq biruzə verir. Belə gənclərdən biri də müxtəlif illərdə fərqli ölkələrdə Azərbaycanı öz bilik və bacarığı ilə təmsil edən Mahir Qurbanovdur.

Sfera.az xatırladır ki, Mahir Qurbanov Göyçay rayonunda doğulub. Daha sonra isə Ukraynanın Xarkov şəhərində yaşayıb.

2008-2012-ci illərdə Azərbaycan Dillər Universitetinin İspan dili üzrə tərcüməçilik fakültəsində təhsil alıb. Tələbəlik illərində ADU-nun Amerika mərkəzində danışıq klubunun rəhbəri olub. 2013-2014-cü illərdə Barselona Dövlət Universitetinin Siyasi təhsil ixtisası üzrə magistr pilləsində təhsil alıb. Bir sıra dövlət tədbirlərində, rəsmi qonaqların qəbulunda ispan dili üzrə tərcüməçilik edib.

Artıq ispandilli ölkələrdə Azərbaycanımızın səsinə çevrilən gəncimiz müxtəlif ispan və latın Amerikası KİV-lərində çıxışlar edir.

Mahir Qurbanov deyir ki, xaricdə təhsil alan gənclərimiz xaricdə azərbaycanlı olduqlarını unutmamaqla yanaşı, mühüm işlər də görürlər: "İspaniyada azərbaycanlılar hər zaman həmrəydirlər, bir-birlərinə köməklik göstərirlər. Bayramlarımızda İspaniyada yaşayan katalonları öz evlərinə dəvət edirlər. İspanlar artıq bilirlər ki, Azərbaycanda hansı adət-ənənələr, bayramları var”.

Xatırladaq ki, Mahir Qurbanov hazırda politoloq kimi fəaliyyət göstərir, eyni zamanda ispan və ingilis dilləri üzrə tərcüməçidir.

Sonda Mahir Qurbanovun müxtəlif zamanlarda İspaniya mətbuatında Azərbaycanın təbliğatı ilə bağlı müsahibə və çıxışlarından ibarət olan bir neçə videonu təqdim edirik.

Sfera.az

İnci