Məlum olduğu kimi Rusiya prezidenti Vladimir Putin dindarlarla baş tutan görüşündə Qarabağ konfliktində nəticə əldə ediləcəyinə ümid etdiyini bildirib. Maraqlıdır, Moskvanın Qarabağ konflikti ilə bağlı nail olmaq istədiyi yekun nəticə nə ola bilər?

Sfera.az mövzu ilə bağlı politoloq İlqar Vəlizadənin fikirlərini öyrənib.

Politoloq hesab edir ki, Moskvanın münaqişədə əldə etmək istədiyi nəticə ilk növbədə öz maraqlarının təmin edilməsinə hesablanıb:

"Rusiya hər bir münaqişə və ya prosesdə öz maraqlarını güdür. İndiki halda Putin prosesdə elə bir nəticəyə nail olmağı düşünür ki, ondan sonra həm Ermənistanı, həm də Azərbaycanı öz nəzarəti altında saxlamaqda davam edə bilsin. Yəni, münaqişə həm Azərbaycanın, həm də Ermənistanın maraqlarına uyğun olaraq öz həllini tapsın, Lakin ilk növbədə məhz Rusiyanın maraqları təmin olunsun”.

Bununla belə politoloq bunun indiki halda az qala, mümkünsüz olduğunu düşünür:

"Bu indiki halda əslində müşküldür. Reallıq öz sözünü deyir, reallıq münaqişənin həll istiqamətlərini müəyyənləşdirir. Hazırda Qarabağın müqəddaratı ilk növbədə cəbhədə həll olunur. Rusiya bu müstəvidə ermənilərin maraqlarını ifadə etməklə çalışır ki, erməni icması Dağlıq Qarabağda qalsın və burada onlar üçün müəyyən hüquqlar təmin olunsun”.

Politoloq hesab edir ki, Azərbaycan Ordusunun cəbhədəki qələbələri danışıqlar prosesinə də təsirsiz ötüşməyəcək:

"Status məsələsinə gəldikdə, bu mövzuda fikir ayrılıqları var. Döyüşlər başlayana qədər haqqında söhbət açılan, müzakirə edilən status-kvo artıq yoxdur. Ermənilərin Azərbaycanın Dağlıq Qarabağ torpağında başqa formada yaşamalarını təmin etmək istəyirlərsə, məsələ ətrafında danışmaq olar. Düşmən qoşunları mərhələli şəkildə ərazilərimizdən çıxarılmalıdır. İş ondadır ki, bu ssenariyə erməni tərəfi razı deyil. Ona görə sülh senarisinin reallaşmasında Ermənistanın mövqeyindən də çox şey asılıdır. Onların mövqeyində dəyişiklik olmasa, Rusiyanın vasitəçiliyi də faydalı olmayacaq”.

Elçin

Sfera.az