Tatarıstanda törədilən terror aktı: polis bölməsinə edilən hücumun təfərrüatları
Tatarıstanda bir yeniyetmə polis bölməsinə hücum edərək, binaya od vurmağa çalışıb, daha sonra bir neçə dəfə hüquq mühafizəçisini yaralayıb. Polis silah işlətməyə məcbur olub və təcavüzkar öldürülüb.
Sfera.az Rusiya mətbuatına istinadla xəbər verir ki, polis bölməsinə hücum gecəyarısı, saat 00:30-da baş verib. Yeniyetmə oğlan polis bölməsinin binasına "Molotov kokteyli” atıb.
Bir müddət sonra sahə müvəkilli maşınla həmin binaya yaxınlaşıb. Avtomobilini park edərkən yanğın və şüşə qırıntıları görüb. Bu zaman yeniyetmə əraziyə daha bir şüşə "Molotov kokteyli” ataraq aradan çıxmağa çalışıb.
Sahə müvəkkili ilə növbətçi polis cinayətkarın arxasınca qaçıb, amma yeniyetmə onları bıçaqla hədələməyə başlayıb, bundan sonra qanun mühafizəçilərindən birini dəfələrlə yaralayıb.
Bunu görən ikinci polis havaya xəbərdarlıq atəşi açıb, oğlan reaksiya vermədiyi üçün ona atəş açmaq məcburiyyətində qalıb. Nəticədə həkimlər gələnədək təcavüzkar dünyasını dəyişib...
"İnterfaks” xəbər verir ki, təcavüzkar öz hərəkətlərini "Allahu əkbər!” harayı ilə müşayət edib. Həmçinin xəbər verilir ki, sözügedən yeniyetmə əslən
Başqırdıstandandır və ekstremizmə meyilli şəxs kimi qeydiyyata salınıb.
Hüquq-mühafizə orqanları baş verən olayı terror aktı kimi qiymətləndirməyə meyllidir. Tatarıstan Daxili İşlər Naziri Artyom Xoxorin hadisə yerinə gəlib.
Tərcümə etdi: Selcan
Sfera.az
