“Düşmən gülləsi ilə ölən mülki şəxs şəhid sayılır?”- Qanunlar və din fərqli mövqedədir
Ermənistan tərəfi son günlər tək cəbhəyanı ərazilərdə deyil, digər bölgələrdə də mülki əhalini hədəf alır. Bunun nəticəsidir ki, sentyabrın 27-dən bu yana düşmən təxribatı nəticəsində 43 nəfər mülki şəxs dünyasını dəyişib.
Cəbhədə döyüşərək, dünyasını dəyişənlərə dövlət tərəfindən şəhid statusunun verilməsi məlumdur. Bəs, maraqlıdır, ermənilərin hədəfə alaraq öldürdüyü mülki əhaliyə də şəhid statusu verilirmi?
Məsələ ilə bağlı Sfera.az-a danışan "ZƏFƏR" Şəhid Ailələrinə Dəstək İctimai Birliyinin rəhbəri Sevinc Orucova düşmən təxribatı nəticəsində ölən mülki əhaliyə şəhid statusunun verilmədiyini bildirib:
"Düşmən təxribatı nəticəsində həlak olan dinc əhaliyə dövlət tərəfindən şəhid statusu verilmir. Hətta hərbi xidmət vaxtı işdən evə gedərkən avtomobildə düşmən hücumu nəticəsində ölən şəxs də şəhid hesab edilmir. Bu qayda yəni, həmin şəxslərə şəhidlik statusunun verilməsi Türkiyədə var, amma bizdə yoxdur ”.
Məsələni dini baxımdan qiymətləndirən ilahiyyatçı-din xadimi Hacı Şahin Həsənli isə düşmən gülləsindən ölən dinc sakinlərin də şəhid olduğunu bildirib:
"Ermənistan növbəti dəfə öz çirkin xislətini ortaya çıxarıb döyüş şəraitində dinc əhalini atəşə tutur. İstənilən savaşda dinc əhali öldürülürsə onlar da şəhid hesab olunur, şəhadət zirvəsinə ucalır. Çünki bunun əsas səbəbi müharibədir və o insanlar evlərində də olsa ordunun yanındadırlar.
Əgər hansısa jurnalist cəbhədə öz peşə fəaliyyətini yerinə yetirən zaman həyatını itirsə o da şəhid hesab edilir. Ümumiyyətlə savaş zamanı düşmən gülləsindən öldürülən insanlar şəhadət zirvəsinə ucalmış sayılırlar”.
Sfera.az
Əzizə Zeynal
