Paşinyan Lavrovun təklifini niyə rədd etdi? – Zərdüşt Əlizadə baş verənləri oyun adlandırdı
Ötən gün Rusiyanın xarici işlər naziri Sergey Lavrov yenidən Madrid prinsiplərini gündəmə gətirib.
Rusiyalı nazir işğal altında olan 7 rayonun danışıqlar yolu ilə geri qaytarılmasını təklif etsə də Ermənistanın baş naziri Nikol Paşinyan çıxışında bu təklifə rədd cavabı verib.
Maraqlıdır, bütün mənalarda ölkəmizə uduzan və çətin durumda olan Ermənistanın Lavrovun təklifinə rədd cavab verməsi nə ilə bağlıdır?
Məsələ ilə bağlı Sfera.az-a danışan Zərdüşt Əlizadə bu təklifi "ictimaiyyətə oynamaq” adlandırıb:
"Əgər onlar Lavrovun da dediyi kimi Madrid prinsiplərinə əməl etsələr 5 rayonu müharibəsiz tərk etməlidirlər. Sonra gözləməlidirlər ki, azərbaycanlı qaçqınlar öz kəndlərinə qayıtsın. Bununla artıq kommunikasiyalar açılacaq, Azərbaycan-Ermənistan münasibətləri bərpa olacaq.
Ticari münasibətlər formalaşacaq ki, bu da illər çəkəcək. Bütün bu müddət ərzində Dağlıq Qarabağ erməniləri ilə Azərbaycan arasında status söhbəti başlayacaq və bunun da konkret müddəti yoxdur. Ona görə də Ermənistan bu təklifə getmir.
Lavrovun təklifinə Paşinyanın mənfi cavab verməsi də normal haldır. Çünki Rusiya tərəfinin bu mövzuda maraq və istəkləri hamımıza məlumdur. Lavrov sadəcə beynəlxalq ictimaiyyətə oynayır”.
Sfera.az
Əzizə Zeynal
