Erməni hakerlər Sfera.az-a hücum etdi - TƏXRİBAT
22:00 / 14.10.2020
2900
Azərbaycan Ordusunun Dağlıq Qarabağda başlatdığı uğurlu əks-hücum əməliyyatları düşmən tərəfdə ciddi qorxu və panika yaradıb. Düşmən cəbhədəki uğursuzluqlarını informasiya müharibəsindəki təxribatlarla kompensasiya etməyə çalışır.
Bu məqsədlə erməni hakerlər Azərbaycanda fəaliyyət göstərən nüfuzlu xəbər agentliklərinə və saytlarına hücumlar təşkil edərək, səhifələrində təxribatçı məlumatlar yerləşdirir. Qeyd edək ki, bir müddət öncə Sfera.az saytına da hücum edilmiş və Azərbaycanda yaşayan xalqlar arasında nifaq salmaq kimi məkrli məqsəd daşıyan "məqalə” yerləşdirilmişdir.
Bu təxribata cavab olaraq bəyan edirik ki, döyüş meydanında olduğu kimi informasiya müharibəsində də qalib tərəf biz olacağıq. Düşmənin etməyə çalışdıqları isə ucuz və bəri başdan iflasa uğrayan fəaliyyətdən başqa heç nə deyil.
Ölkəmizdə yaşayan bütün xalqların bir vətəni var – Azərbaycan! Bu ölkə Ermənistandan fərqli olaraq monoetnik tərkibə malik deyil, Azərbaycanda çoxsaylı xalqlar yaşayır. Müharibəmiz isə Vətən Müharibəsidir və bu vətənin bütün xalqlar və vətəndaşları bu torpaq uğrunda fəadakarlıqla savaşır.
Görünür, Azərbaycan xalqının bu birlik əzmi və qələbə ruhu düşməndə böyük qorxu yaradıb. Qorxunun isə əcələ faydası yoxdur.
Azərbaycanda yaşayan bütün xalqlar vətənin müdafiəsindədir və mənfur düşmənlərimiz üzərindəki parlaq qələbəni də birlikdə qeyd edəcəklər.
