Azərbaycan-Türkiyə münasibətlərinin hərbi və siyasi əhəmiyyətinin detalları
"Rus hərb elmində "dronların nərəsi” ifadəsi var. Biz də bu "nərə”ni Tovuz təxribatına cavab verərkən göstərdik”.
Bunu "MediaPost”a açıqlamasında hərbi ekspert Abuzər Əbilov deyib.
Onun fikrincə, Tovuz hadisələrində Türkiyə Azərbaycana hərbi-siyasi dəstəyini ifadə etməklə dünya hərb tarixinə və dünya geopolitikasına iki ölkə birliyini nümayiş etdirdi:
"Biz tarixi məqama şahidlik etdik, hadisələr təkrarlanır. Türkiyə və Azərbaycanın Sovetlər dönəmindən sonrakı həm hərbi, həm də siyasi aspektdən yaxınlaşması bəlkə bu qədər böyük olmamışdı. Türklər bizim qardaşımızdır, biz eyni millət, iki dövlətik. Bu gün Türkiyə və Azərbaycan hərbi birləşməsi dünyanın hərb tarixinə yenilik gətirir. Türkiyə-Azərbaycan birgə hərbi təlimi ənənəvi təlimlər müstəvisindən çıxıb, qeyri-ənənəvi döyüş üsullarının bugünkü hərb tarixinə gətirilməsidir. İndiyə kimi özümüzə bir hərb taktikasını qəbul elətdirmişdik. Əvvəllər silahı götürüb erməninin üzərinə hücum çəkirdik. Belə halda isə insan itkisinin çox olması qaçılmaz idi. Lakin bu gün Türkiyənin Suriyada apardığı əməliyyatlarda az insan itkisini və texnikanın düşmən üzərindəki qələbəsini görürük. Zərbə və yüksək dəqiqlikli atəş dronlarını nümunə çəkə bilərik. Doğrudur, bu sahədə Azərbaycan Ordusunun az da olsa, təcrübəsi vardı. Çünki Aprel döyüşlərində İsrail dövlətindən əldə etdiyimiz "Zərbə” pilotsuz uçuş aparatlarından istifadə etmişdik. Rus hərb elmində "dronların nərəsi” ifadəsi var. Biz də bu "nərə”ni Tovuz təxribatına cavab verərkən göstərdik”.
A.Əbilovun sözlərinə görə, Türkiyə-Azərbaycan münasibətləri ölkədə türk hərbi bazalarının yaradılması qədər vacib məsələni ortaya çıxarır:
"Mən əminəm ki, yaxın günlərdə Azərbaycanda Türkiyənin hərbi bazalarının yaradılacağını görəcəyik. Bilmək lazımdır ki, artıq nə türk mehmetciyi, nə türk zabiti, nə də türk bazası bizim üçün xarici deyil. Adi bir nümunə deyim, biz küçəyə çıxanda hansısa mübahisəli mühitə keçəndə ilk olaraq, qardaşımız kömək edir. Türkiyə də bizim qardaşımızdır. Məsələ o deyil ki, türklər Qarabağda döyüşəcək, bizsə yerimizdə oturacağıq. Xeyr. Söhbət hərbi təlimatdan, yeni hərbi texnikalardan, mənəvi dəstəkdən gedir. Mən arzulayıram ki, Azərbaycanda Türkiyənin hərbi bazaları olsun”.
