“Türkiyə ilə müştərək təlimlərin uğurla davam etdiyi vaxtda təxribatların olması gözlənilən idi”

"Azərbaycan Respublikası Silahlı Qüvvələrinin Baş Qərargahı radikal müxalifətin qərargahı deyil. Orada hər kəs istədiyini deyə bilməz”.

Bunu "MediaPost”a açıqlamasında ehtiyatda olan zabit, hərbi ekspert Abuzər Əbilov deyib.

O bildirib ki, Silahlı Qüvvələrin Baş Qərargah rəisi haqqında dezinformasiyalar yayanlar dövlət və dövlətçiliyi zəiflətməyə çalışırlar:

"Azərbaycan və Türkiyə silahlı qüvvələrinin müştərək təlimlərinin uğurla davam etdiyi vaxtda təxribatların olması gözlənilən idi. Çünki düşmənin informasiya müharibəsində sapı özümüzdən olan baltaların dövlətə, onun silahlı qüvvələrinə atdığı böhtanların dayandırılmasını düşünmək sadəlövhlük olardı. Bu məsələdə çox incə məqam var, təəssüf ki, bunu əksər vətəndaşlarımız tuta bilmədilər. Onlar dezinformasiyalar yaymaqla, vətəndaşları kütləvi nümayişə, etiraz aksiyalarına təşviq etmək istəyirlər. Bu formada dövlət və dövlətçiliyi zəiflətməyə çalışırlar. Azərbaycan Respublikasının Silahlı Qüvvələrinin Baş Qərargahı radikal müxalifətin qərargahı deyil. Orada hər kəs istədiyini deyə bilməz. General-polkovnik Nəcməddin Sadıkov Silahlı Qüvvələrin Baş Qərargah rəisidir. Bəli, çox sərt adamdır və bu, onun hərbçi həyatı ilə bağlıdır. Hərbçi belə də olmalıdır, o, şou əhlinin adamı deyil”. 

A. Əbilovun sözlərinə görə, hazırda yayılan bütün yalan xəbərlər Türkiyə ilə Azərbaycanın tərəfdaşlığını gözü götürməyənlərin növbəti təxribatıdır:

"Keçirilən müşavirədə hərbi aspektlərdə səhvlərin olmaması üçün töhmətlər verilə bilər. Lakin Baş Qərargah rəisi məsuliyyətsiz insan deyil ki, ortaya atılan bu dezinformasiyadakı kimi, zabitləri təhqir etsin. Bütün bu yalan xəbərlər Türkiyə ilə Azərbaycanın tərəfdaşlığını gözü götürməyənlərin növbəti təxribatıdır. Vətənini sevən insan üçün qürurverici hal odur ki, Türkiyə bu gün regionda liderliyi ələ alır. Burada gedən siyasi proseslərə qatılması bizim üçün arzuolunandır. Sözsüz ki, bəzi qüvvələr bu tərəfdaşlığa mane olmağa çalışırlar. Deyirlər ki, Nəcməddin Sadıkov Rusiyanın adamıdır və s. Bu insanlar unudurlar ki, Nəcməddin Sadıkovu dünya siyasətçiləri sırasında xüsusi çəkisi olan rəhmətlik Ulu Öndər Heydər Əliyev vəzifəyə gətirib. Sizcə, belə idisə, dünya siyasətini əlində saxlayan Heydər Əliyev Nəcməddin Sadıkovu Müdafiə Nazirliyinə, Silahlı Qüvvələrin Baş Qərargah rəisi vəzifəsinə təyin edərdimi?”