Şəxsiyyət vəsiqəsilə Türkiyəyə… - Mövlud Çavuşoğlunun təklifinə reaksiyalar
"Bu ancaq kiçik həcmli biometrik şəxsiyyət vəsiqələrilə mümkün ola bilər”.
Bu sözləri Sfera.az-a açıqlamasında Türkiyə Xarici İşlər naziri Mövlud Çavuşoğlunun Türkiyə və Azərbaycan vətəndaşlarının qarşılıqlı ziyarətlərdə şəxsiyyət vəsiqəsilə səyahətin mümkünlüyü təklifinə münasibət bildirərkən hüquqşünas Fərhad Mehdiyev deyib:
"Türkiyə Xarici İşlər nazirinin nəzərdə tutduğu şəxsiyyət vəsiqələri Avropa İttifaqı ölkələri arasında mövcud olan biometrik şəxsiyyət vəsiqələri kimidir. Biometrik olduğundan onlardan istifadə etmək mümkündür. Əslində Çavuşoğlunun təklifinin reallaşması texniki məsələdir. Hazırda çoxsaylı Azərbaycan vətəndaşının xarici pasportları var, belə sənədə malik olmayanların sayı çox azdır. Bu sənəd vasitəsilə də gedib-gəlmək mümkündür”.
Həmsöhbətimizin fikrincə bununla belə şəxsiyyət vəsiqələrilə Türkiyə və Azərbaycan vətəndaşları arasında gediş-gəlişin həyata keçirilməsinin simvolik tərəfi var:
"Belə ki, iki qardaş ölkə arasında inteqrasiya mərhələsi yüksək səviyyədə olduğundan artıq şəxsiyyət vəsiqələrilə gedib-gəlmək mümkündür. Düşünmürəm ki, şəxsiyyət vəsiqələrilə səyahətə imkan verilməsinin yaradacağı hər hansı bir texniki çətinlik olsun. Bir çox insanın xarici pasportu olduğundan rahat gedib gələ bilir. Başqa bir tərəfdən,şəxsiyyət vəsiqələrilə gedib-gəlməyə imkan verilməsi sərhəd bölgəsində yaşayan, məsələn Naxçıvan əhalisi üçün rahatlıq yaradar. Fikrimcə, Mövlud Çavuşoğlu şəxsiyyət vəsiqələrilə səyahətə icazə verilməsini sırf simvolik mənada deyib. Kiçik həcmli biometrik şəxsiyyət vəsiqələrilə bu addımın atılması mümkündür. Amma köhnə tipli böyük şəxsiyyət vəsiqələrilə mümkünsüzdür”.
"Prinsipcə mümkündür”.
Bu fikirləri isə sayta açıqlamasında Milli Məclisin deputatı Asim Mollazadə söyləyib:
"Prinsipcə bu addımın atılması mümkündür. Çünki yeni formatda şəxsiyyət vəsiqələri müasir məlumatlarla tam əhatə olunub. Ona görə də şəxsiyyət vəsiqələrilə səyahəti mümkün hesab edirəm. Necə ki, Türkiyə ən yaxın qonşuları Ukrayna və Gürcüstanla anoloji addımı atıb, Azərbaycanla da bu istiqamətdə addım atılmalıdır. Azərbaycanda da artıq yeni biometrik şəxsiyyət vəsiqələri verilir. Burada sadəcə bəzi texniki maneələr aradan qaldırılılmalıdır. Azərbaycan Türkiyə münasibətləri ən yüksək səviyyədə təmin edilməlidir”.
Elçin
Sfera.az
