Bakı metrosunda izdiham yaşandı: qatarlar gecikdi
Bu dəqiqələrdə Bakı Metropoliteninin stansiyalarındakı qatarların hərəkətində gecikmə baş verib.
Milli.Az big.az-a istinadən bildirir ki, "28 May" stansiyasından "Həzi Aslanov" istiqamətində hərəkət edən qatar 10 dəqiqəyə yaxın gecikib. Nəticədə metroda izdiham yaşanıb.
Bu barədə açıqlama verən Bakı Metropoliteninin mətbuat xidmətinin rəhbəri Nəsimi Paşayev bildirib ki, qatarın gecikməsinə səbəb nasazlıq olub:
""28 May" stansiyasından "Həzi Aslanov" istiqamətində hərəkət edən qatarda nasazlıq olduğundan 6-7 dəqiqə gecikmə qeydə alınıb. Bu təbii olaraq digər qatarların da ləngiməsinə təsir edib. Hazırda qatarların normal hərəkəti, interval bərpa edilib".
N.Paşayev onu da əlavə edib ki, metroda sərnişinlərin təhlükəsizliyinin tam təmin olunması üçün polis əməkdaşları gücləndirilmiş iş rejimində çalışır:
"İndi metro stansiyalarında təkcə giriş-çıxışlarda deyil, stansiyaların hər yerində, platformalarında da polis əməkdaşları təhlükəsizlik tədbirlərinə cəlb edilib. Bütün metro stansiyalarında təhlükəsizlik tədbirləri gücləndirilib. Hər hansı hadisə, təxribatın baş verməməsi üçün polis gücləndirilmiş iş rejiminə keçib. Narahatlıq üçün heç bir əsas yoxdur".
