Tanınmış aparıcının adı ilə qadınlarla yazışan kimlərdir? – İLGİNC PAYLAŞIM

"Artıq neçə müddətdir ki, müxtəlif ölkələrdən qadınlar mənə yazırlar ki, sizin adınızdan bizə kələk gəliblər. Beynalxalq "aferist”lər balaca ölkələrdən olan tanınmış FB izləyicilərinin şəkilləri ilə feyk profil açırlar və məhəbbət intizarında olan tənha xanımlara məktublar göndərirlər”.

Sfera.az xəbər verir ki, bu sözləri özünün sosial şəbəkə hesabında tanınmış televiziya aparıcısı Azər Qərib yazıb. Özünün hansı səbəbdən qurban seçildiyini anlamadığını yazan aparıcı baş verənləri belə təsvir edib: "Qoyurlar mənim qlamur şəkillərimi, başlayırlar basıb-baqlamağa ki, ay mən səni belə sevirəm, gecələr gəlirsən yuxuma, sənsiz bir günüm olmasın, mən belə biznes-klasla uçuram, ay Maldiv belə getdi, Seyşel belə gəldi, pul məndə, bir də ingilisdə, səni də aparacam özümlə, buralarda ol. Sadəcə olaraq, indi bir balaca çətinliyim var, mənə çox yox, 500 dollar göndər, gələn ay gedirik səninlə bal ayına.

Bu yazıq da neyləsin, sonuncu dəfə kişidən komplimenti 739 il bundan əvvəl eşidib, pensiyası da yaxşı, göndərir 500 dollar ki, caaan, ala bu pulu, gözləyirəm səni.

O isə pulu alıb çıxır aradan, xanım qalır hönkürə-hönkürə, məni tapıb, gileylənir.

Braziliyadan yazıb şikayətlənən var, Avstriyadan, İtaliyadan, hətta Vyetnamdan belə. Mən cavab vermirəm, nə deyim ki, özləri görürlər ki, mənlik deyil.

Odur ki, bu gündən keçirəm xozrasşöta, hansı xarici ağbirçək mənimlə yazışmaq istəsə, əvvəlcədən hesabıma depozit köçürməlidir.

Pandemiya yıxdı büdcəmizi, biraz dirçələrik heç olmasa...”