Tələbələr üçün vacib xəbər: Ödədikləri pullar ya qaytarılacaq... +VİDEO

"Nazirlər Kabinetinin "Sosial baxımdan həssas əhali qrupuna aid edilən ailələrin üzvü olan tələbələrin təhsil haqqı xərclərinin ödənilməsi barədə” qərarının icrasına başlamaq üçün ilk növbədə bu qrupa daxil olan tələbələr ailə üzvləri haqqında məlumatı əks etdirən sənədləri təhsil aldıqları müəssisələrə təqdim etməlidirlər”. 

Sfera.az   xəbər   verir    ki, bunu APA TV-yə açıqlamasında Təhsil nazirinin müavini İdris İsayev deyib: 

"Tələbələr bu kateqoriyadan olan ailələri haqqında məlumatları təhsil aldıqları təhsil müəssisələrinə təqdim etməlidirlər. Çünki, təhsil müəssisələri bütün tələbələri haqqında dolğun məlumata malik deyillər. Təhsil müəssisələri üçün artıq elektron platforma formalaşdırılır. İşlər tamamlandıqdan sonra təhsil  müəssisələri bu  platformaya tələbələr haqqında məlumatları daxil edəcək. Bundan sonra elektron informasiya sistemi özü bu informasiyaları nəzərdən keçirib müəyyən edəcək ki, bu şəxslər qəbul edilən statusa cavab verirmi. Əgər həmin ailələr bu statusa malikdirsə o zaman həmin tələbənin təhsil haqqı xərci dövlət büdcəsi tərəfindən qarşılanacaq”. 

Nazir müavini deyir ki, təhsil haqqından azad olunacaq şəxslərə bu barədə məlumat onun mobil telefonuna göndəriləcək. Eyni zamanda karantin dövründə təhsil müəssisələri fəaliyyət göstərmədiyinə görə, tələbələr müvafiq sənədləri elektron qaydada təqdim edə biləcəklər:

"İyirimi gün müddətində inteqrasiya prosesi həyata keçiriləcək. Bir ay müddətində ASAN Xidmət tərəfindən təhsil informasiya sisteminə inteqrasiya həyata keçiriləcək. Əgər tələbə tam əmindirsə ki, onun valideynləri və ya özü bu kateqoriyalara malikdir o zaman həmin tələbələr təhsil haqqını ödəməyə bilərlər. Həmin təhsil müəssisəsi o tələbədən təhsil  haqqını  məcbur şəkildə ala bilməz. Təbii ki,  tələbə də lazım olan sənədləri müəssisəyə  təqdim etməlidir”.

O ki, qaldı müəyyən edilmiş kateqoriyadan olan tələbələrin bu günə kimi ödədiyi təhsil haqlarının taleyinə. Nazir müavini deyir ki... 

"Biz həmin vəsaiti tələbənin həmin semestr üçün vəsaiti artıq ödəməsindən asılı olmayaraq həmin təhsil müəssisəsinə köçürəcəyik. Artıq tələbə ilə təhsil müəssisəsi ödənilmiş vəsaitin ya tələbəyə geri qaytarılması və ya növbəti il üçün əvəzlənməsi məsələsinə baxa bilər. Yəni qarşılıqlı razılıq əsasında həyata keçiriləcək. Bir sözlə biz həmin tələbələrin vəsaitini təhsil müəssisəsinə ödəyəcəyik”.

Xatırladaq ki, Nazirlər Kabineti sosial baxımdan həssas əhali qrupuna aid edilən ailələrin üzvü olan tələbələrin təhsil haqqı xərclərinin ödənilməsinə dair qərar qəbul edib. Qərarda bildirilir ki, Azərbaycan Respublikasının təhsil müəssisələrində normativ təhsil müddətində ödənişli əsaslarla əyani təhsil alan (təkrar ali və orta ixtisas təhsili istisna olmaqla) və sosial baxımdan aşağıdakı həssas əhali qrupuna aid edilən ailələrin üzvü olan tələbələrin 2020-ci ildə tədris semestrləri (yarımillikləri) üçün təhsil haqqı xərcləri dövlət büdcəsinin vəsaiti hesabına ödəniləcək:

1.2.1. I və II dərəcə əlilliyi olan şəxslər;

1.2.2. işsiz kimi qeydiyyatda olanlar;

1.2.3. yaşa görə əmək pensiyaçıları;

1.2.4. yaşa görə sosial müavinət alanlar daxildir. 

Bu kateqoriyaya aid olan tələbələrin sayı hazırda 20 mindən çoxdur. Bu məqsədlə dövlət büdcəsindən 40 milyon manat vəsait ayrılacaq.