Türkiyədə növbəti terror xəbərdarlığı

Ötən bazar günü Türkiyənin paytaxtı Ankarada çox sayda insanın ölməsi ilə nəticələnən terror hadisəsi barədə Amerika Birləşmiş Ştatlarının (ABŞ) bu ölkədəki səfirliyi öncədən xəbərdarlıq etmişdi.
Sfera.az andpress-ə istinadən xəbər verir ki, bu xəbərdarlığa ABŞ-ın Türkiyədəki səfirliyinə aid internet saytının ingiliscə versiyasında yer verilmişdi.
Martın 11-də "ABŞ vətəndaşlarına təhlükəsizlik xəbərdarlığı” başlığı ilə paylaşılan mesajda Bahçelievler bölgəsinin təhlükəli olduğu bildirilmiş və amerikalıların bu yerdən uzaq olmaları barədə xəbərdarlıq edilmişdi.
Yerli mətbuat ABŞ səfirliyinin növbəti dəfə yeni bir terror hadisəsi barədə xəbərdarlıq yaydığını qeyd edib. Bildirilir ki, ABŞ şirkətlərinə göndərilən mesajda martın 20-də növbəti terror hadisəsi baş verəcəyi barədə xəbərdarlıq olunur. Mesajda, dövlət və hökumət binaları kimi terrorrun ilk hədəfi ola biləcək yerlərdən uzaq olunması tələb edilir, diqqət; ictimai binalara, hərbi yaşayış massivlərinə, diplomatik missiyalara, meydanlara, məbədlərə, turistik mərkəzlərə yönəlmiş təhlükələrə cəlb olunur.
Mesajda həmçinin Novruz bayramının həftə sonuna təsadüf etməsi səbəbindən təhlükənin çoxaldığı vurğulanır: "Kütlələrin toplaşdığı hər yerdən uzaq olun. Hökumət obyektləri, səfirliklər, ticarət mərkəzləri kimi hədəf ola biləcək yerlərdən uzaq olun. Yol hərəkəti istiqamətlərinizi bu həftə üçün göstəriləcək xəbərdarlıqlar istiqamətində dəyişdirin və ya tənzimləyin. Ailənizə və yaxınlarınıza mütəmadi xəbərdarlıqlar edin.” – deyə açıqlamada bildirilir.
Martın 13-də yerli vaxtla saat 18.35-də Türkiyənin paytaxtı Ankaradakı "Qızılay” meydanının yaxınlığında terror hadisəsi baş vermişdi. Kamikadzenin hərəkətdə olan avtomobillə avtobus dayanacağında törətdiyi partlayış nəticəsində rəsmi rəqəmlərə görə 37 nəfər ölmüş, 125 nəfər müxtəlif dərəcəli bədən xəsarətləri almışdı.