Ekspert: “Bu həftə neftin qiyməti 40 dollardan yuxarı yüksələ bilər”
"Martın 18-də Neft İxrac Edən Ölkələr Təşkilatının (OPEC) Texniki Komitəsinin iclası keçiriləcək. Bu iclasda martdan sonrakı dövr üçün neftin həcmləri ilə bağlı yeni tövsiyələr verilərək formalaşdırılmalıdır".
Sfera.az xəbər verir ki, bunu report-a açıqlamasında Neft Araşdırmalar Mərkəzinin rəhbəri, iqtisadçı-ekspert İlham Şaban bildirib.
Onun sözlərinə görə, bu tarixə isə cəmi bir həftə qalıb, neftin qiyməti dünəndən bu günə artıq 7% artıb: "Artıq şok effekti keçmək üzrədir. Nəticə etibarı ilə biz bu həftə ərzində neftin qiymətində 40 dollardan yuxarı bir səviyyəni görəcəyik”.
Ekspert deyir ki, martın sonunda artıq neftin qiymətinin 45-50 dollar/barel civarında olmasını görəcəyik: "Bu, bir şok effekti idi və bundan sonra bazar iştirakçıları daha soyuqqanlı addımlar atacaqlar. Bundan öncə neftin bir barelinin qiyməti 51-52 dollar civarında olub. Hazırki şəraitdə neftin bir barelinin qiymətinin 45-50 dollar olması bazar üçün daha da məqbuldur. Baxmayaraq ki, bu gün dünya iqtisadiyyatı azalıb. Bugünkü gün üçün bu qiymət də reallığı əks etdirən bir qiymət hesab edilə bilər”.
İqtisadçı-ekspert İlham Şaban:
"Azərbaycanın dövlət büdcəsinə yenidən baxılmasına ehtiyac olmayacaq".
Neft Araşdırmalar Mərkəzinin rəhbəri düşünür ki, neftin bir bareli bu qiymətdə olsa, Azərbaycanın dövlət büdcəsinə yenidən baxılmasına ehtiyac olmayacaq: "Çünki, Maliyyə Nazirliyinin Yeni Büdcə Qaydalarına əsasən, neftin bir barelinin qiymətinin 40 dollara qədər düşməsi büdcəyə gələn gəlirlərin 1,6% aşağı azalması deməkdir. Bu da təxminən 400 milyon manat təşkil edəcək. Bu isə olduqca kiçik bir rəqəmdir”.
