Günəş gözlənildiyindən də aktivləşib - NASA

NASA və ABŞ-nin Milli Okean və Atmosfer Administrasiyası (NOAA) Günəş Dövrü 25-in əvvəlki proqnozların əksinə olaraq daha güclü başladığını açıqlayıb.
Sfera.az xarici mediaya istinadən xəbər verir ki, 2019-cu ildə başa çatan 24-cü dövrdən sonra alimlər yeni dövrün zəif keçəcəyini ehtimal edirdilər. Lakin müşahidələr göstərib ki, Günəşin fəaliyyəti gözlənilməz dərəcədə artıb.

NASA-nın “Jet Propulsion” Laboratoriyasından plazma fizika alimi Ceymi Casinski bildirib:

“Bütün işarələr Günəşin uzunmüddətli passivlik dövrünə girəcəyini göstərirdi. Ancaq prosesin əksinə dəyişməsi bizim üçün sürpriz oldu”.

Mütəxəssislərin sözlərinə görə, Günəş hər 11 ildən bir maksimal aktivliyə çatır, sonra isə yenidən minimum mərhələyə enir. Bu dövrlərdə günəş ləkələri, partlayışlar və tac kütlə atımları artır. Həmçinin Günəşin maqnit qütblərinin dəyişməsi də bu prosesin bir hissəsidir.

NASA-nın digər alimi Marko Velli isə uzunmüddətli günəş məlumatlarını təhlil edərək maraqlı nəticələrə gəlib:

“2008-ci ildə, 24-cü dövrün başlanğıcında günəş küləyi güclənməyə başladı və o vaxtdan bəri davamlı şəkildə artır. Bu artım sürət, sıxlıq, temperatur, təzyiq, kütlə, impuls, enerji və maqnit sahəsinin böyüklüyü ilə ölçülür. Əmin olduğumuz yeganə şey – Günəşin bundan sonra nə edəcəyini dəqiq proqnozlaşdırmağın çox çətin olmasıdır”.

Alimlər qeyd edirlər ki, Günəşin bu davranışı Yer kürəsinə də birbaşa təsir edə bilər və yaxın illərdə kosmik hava şəraitində ciddi dəyişikliklər baş verə bilər.

Bəsti Rəfizadə
Sfera.az