Sfera.az-ın məlumatına görə, bunu Gələcək Azərbaycan Partiyasının sədri Ağasif Şakiroğlu son günlər sosial şəbəkələrdə müzakirə obyekti olan "uşaqpulu” mövzusuna reaksiya verərkən bildirib.

 

Partiya sədri təklif edir ki, uşaqlarla bağlı mövcud olan birdəfəlik müavinət daxil, digər müavinətlərin hər biri bir qayda olaraq ləğv edilsin, əvəzində isə doğulduğu aydan başlayaraq 18 yaşı tamam olana qədər hər bir uşağa aylıq 50 manat müavinət müəyyən edilsin:

"Ölkədə 2 milyon 600 min yetkinlik yaşına çatmamış uşağın olduğunu nəzərə alsaq, bu ayda dövlət büdcəsinə 130 milyon manata, ildə isə 1 milyard 560 milyon manata başa gələcək. Burada elə böyük mübahisə yaradacaq məsələ olmadığını düşünürəm. Dövlət büdcəsi üçün 1.5 milyard manatın bir il ərzində böyük kəsir yaratmayacağı qənaətindəyəm. Eyni zamanda nəzərə alsaq ki, heç də 2 milyon 600 min uşağın hamısı aztəminatlı ailələrdə dünyaya göz açmır”.

Partiya sədri həmçinin bildirib ki, valideyinlərin aylıq rəsmi gəliri minimum əmək haqqının 4 mislindən çox olan ailələrin övladlarına uşaq pulu ödəməkdən dövlət azad edilsin:

"Və bu tip ailələr aztəminatlı ailə kateqoriyasına aid edilməsin. Bununla da dövlət büdcəsindən ehtiyacı olmayan ailələrə və bu ailələrin övladlarına artıq pul verməməklə qənaət etmək olar. Belə olacağı halda, təxminən ayda 100 milyon (ildə 1 milyard 200 milyon) olmaqla dövlət sağlam gələcəyinə rahatlıqla sahib çıxmış olar”.