Xəbər verdiyimiz kimi, son günlər instaqramda bir çox profilin izləyici sayında azalma müşahidə olunur.

Sfera.az xəbər verir ki, bu hal təkcə xəbər səhifələrində deyil, dünya ulduzları və yerli məşhurlar arasında da yaşanıb.

Bir çox tanınmış şəxs bununla bağlı paylaşım edərək, silinən izləyicilərinin sayını açıqlayıb.

Müğənni Nura Suri 16 min 700 izləyicisinin silindiyini bildirib. Hazırda sənətçinin instaqram hesabında 393 min izləyici var.

Aktrisa Zümrüd Qasımova 5 min izləyici itirdiyini açıqlayıb. Onun hazırda 148 min izləyicisi var.

Aktrisa Sevinc Əliyeva isə 4 min izləyicisinin azaldığını vurğulayıb. Sənətçinin hazırda 111 min izləyicisi var.

Aparıcı İsa Şükürov idarə etdiyi "show_news" səhifəsində 25 mindən çox izləyicinin azaldığını yazıb. Hazırda səhifənin 1 milyon izləyicisi var.

Aparıcı İlkin Həsəni isə 30 min izləyicisinin silindiyini bildirib. Hazırda 549 min izləyicisi olan İlkin "Bu, hər ciddi hesabın başına gəlir" sözlərini qeyd edib.

Müğənni Aysel Əlizadə 33 min 432 izləyicisinin yoxa çıxdığını paylaşıb. Onun hazırda 673 min izləyicisi var.

Bloger Aynişan Quliyeva isə 45 minə yaxın izləyicisinin silindiyini açıqlayıb. Hazırda 1,4 milyon izləyicisi olan Aynişan "Çoxları düşünür ki, 'bot' vurmuşuq və onlar silinir. Amma belə deyil. Bu izləyicilərin heç kimə xeyri yoxdur. Bundan sonra daha çox aktivlik olacaq" sözlərini əlavə edib.

Müğənni Ayan Babakişiyeva da 56 min izləyicisinin yox olduğunu deyib. 735 min izləyicisi olan ifaçı "Qızım Selenanın səhifəsində 3-4 min izləyici gedib. Bu, süni artırma olub demək deyil. Qeyri-aktiv izləyicilər silinir" sözlərini deyib.

Aktrisa Xəyalə Quliyeva 14 mindən çox izləyicisinin silindiyini paylaşıb. 546 min izləyicisi olan aktrisa "Ay instaqram, durduğumuz yerdə niyə belə edirsən? Məndə hamısı real izləyici idi. 14 478 izləyicimi niyə alırsan" sözlərini yazıb.(axşam.az)

2 günə 50 minə yaxın izləyici itirdilər