“Qarabağ effekti”: Mourinyodan sonra Bruno Lage də “qurban” oldu

Futbol dünyasında bəzən təsadüflər diqqətçəkən paralellər yaradır. 

 

Sfera.az xəbər verir ki, Jose Mourinyo “Fənərbaxça”nın baş məşqçisi olduğu dönəmdə “Benfika”la oyunda aldığı məğlubiyyət sonda onun istefasına səbəb olmuşdu.

 

Klub rəhbərliyi həmin nəticəni qəbul etmədi və məşhur portuqaliyalı məşqçi ilə yollarını ayırdı. Bu hadisə Türkiyə futbolunda geniş rezonans doğurmuşdu.

 

İndi isə oxşar ssenari Bruno Lage ilə yaşanır. Onun “Qarabağ” qarşısında aldığı məğlubiyyət karyerasına ağır zərbə vurdu və nəticədə “Benfika” rəhbərliyi portuqaliyalı mütəxəssislə yollarını ayırmaq qərarına gəldi.

 

Əslində, hər iki hal futbolun sərt qanunlarını göstərir: böyük klublarda uğursuz nəticələrə səbəb kimi dərhal məşqçi hədəf seçilir. Maraqlı məqam isə odur ki, "Benfika" Mourinyonu klubsuz qoysa da, “Qarabağ”ın sayəsində Mourinyo yenidən klub məşqçisi ola biləcək. Yayılan məlumatlara görə, "Benfika"da boş qalan məşqçi vəzifəsinə məhz Mourinyo gətiriləcək. 

 

Beləliklə, “Qarabağ” artıq təkcə Azərbaycanı Avropada təmsil edən klub deyil, həm də məşqçilərin taleyinə təsir edən “görünməz hakim” rolunu oynamağa başlayıb.

 

Firuzə Əliyeva
Sfera.az