30 Avqust Beynəlxalq İtkin Düşmüşlər Günüdür

Avqustun 30-u dünyada Beynəlxalq İtkin Düşmüşlər Günü kimi qeyd olunur. Bu günün əsas məqsədi – müxtəlif münaqişələr, silahlı toqquşmalar, təbii fəlakətlər və insan alveri nəticəsində itkin düşən insanların taleyinə diqqət çəkməkdir.

Sfera.az xəbər verir ki, BMT-nin məlumatına görə, hazırda yüz minlərlə insan müharibə, zorakılıq və qeyri-insani rəftar səbəbindən itkin düşmüş sayılır.

Onların çoxu ailələrindən xəbərsiz saxlanılır, bəzilərinin taleyi isə illərlə naməlum olaraq qalır.

Beynəlxalq hüquqa görə, hər bir insanın yeri və taleyi barədə ailəsinə məlumat verilməlidir. Lakin dünyanın bir çox bölgəsində bu hüquq pozulur. Bu səbəbdən Beynəlxalq Qırmızı Xaç Komitəsi (BQXK) və digər humanitar təşkilatlar itkin düşmüş şəxslərin axtarışı və onların ailələrinə dəstək göstərilməsi istiqamətində fəaliyyət aparır.

Azərbaycan da itkin düşmüş şəxslərin sayına görə ən çox zərər çəkmiş ölkələrdən biridir. Rəsmi məlumatlara görə, Birinci Qarabağ müharibəsi dövründə minlərlə azərbaycanlı itkin düşüb və onlardan hələ də heç bir xəbər yoxdur.

Bu gün həm də itkin düşənlərin ailələrinə mənəvi dəstək göstərmək, onların ədalət və həqiqət axtarışını gündəmdə saxlamaq üçün xüsusi önəm daşıyır.

Bəsti Rəfizadə
Sfera.az