“Nə təkzib edirlər, nə də...” - Moskvanın Şuşaya atılan “İsgəndər” raketilə bağlı müəmmalı susqunluğu
14:50 / 07.04.2021
1012
Şuşada qalıqları tapılan "İsgəndər-M” raketləri
ilə bağlı nədənsə hələ də Rusiya tərəfi məsələyə rəsmi şəkildə münasibət
bildirməyib. Bu məsələ yalnız mediada qabardılır. Hansı ki, bəzi mətbu
orqanlarının yazdığına görə, müvafiq orqanlar məsələ ətrafında araşdırmaya
başlayıb.
Görünən odur ki, bu tipli açıqlamalar Azərbaycan
ictimaiyyətinin narahatlığını aradan qaldırmadı. Çünki əsas suallar hələ də cavabsız
qalır. Ona görə də Rusiyanın aidiyyəti
orqanlarının - Müdafiə Nazirliyi, Xarici İşlər Nazirliyi, bu ölkənin Azərbaycandakı
səfirliyinin məsələyə qənaətbəxş münasibət bildirmələri zəruridir.
Məsələ ilə bağlı Sfera.az-a danışan Milli Məclisin
deputatı Elman Nəsirov bildirib ki, hələ də Şuşaya atılan "İsgəndər-M” raketlərilə
bağlı müəmmalar qalmaqdadır, suallara mükəmməl cavab almamışıq. Həmsöhbətimizin
fikrincə, bu müəmmaya son qoymaq üçün məsələyə Rusiyanın ali hərbi rəhbərliyi səviyyəsində
bitkin cavab verilməlidir:
"Son zamanlar dünya KİV-lərinin diqqət mərkəzində
saxladığı mövzular sırasında Rusiyaya məxsus böyük dağıdıcı gücə malik "İsgəndər-M”
raketlərinin Şuşaya atılması məlumatları
geniş yayılıb. Rusiya tərəfi dəfələrlə bəyan
edib ki, sözügedən silahların heç bir xarici ölkəyə ixracı mümkün deyil. Onların
iddialarına görə, yalnız, 280 km məsafəni vurmaq gücündə olan "İsgəndər-E” versiyası Ermənistana verilib. Lakin Şuşaya
atılan iki ədəd raket "İsgəndər-M” variantıdır.
Bunun nəticəsində çoxsaylı sullar yarandı ki, hələ də həmin suallara mükəmməl,
qənaətbəxş cavab ala bilməmişik”.
Deputatın sözlərinə görə, məsələ artıq
Rusiyanın siyasi-hərbi rəhbərliyinin də diqqət mərkəzindədir: "Hətta Rusiya mətbuatının yazdığına görə Federal Tədqiqat Bürosu məsələ ilə bağlı tədqiqatlara
başlayıb. Ancaq bununla belə görünən
odur ki, məsələ daha çox mətbuatda müzakirə olunmaqda davam edir. Rəsmi şəkildə isə bitkin cavab alınmayıb. Eyni
zamanda, təkzib də yoxdur. Çünki əlahəzrət fakt göz qarşısındadır, dəlil və
sübutlar var”.
Elçin