"Son zamanlar məktəblərdə baş verən hadisələrlə bağlı xəcalət çəkirəm. Müəllim uşağı döyür, baxçada uşağı vururlar, tələbə müəllimin üzünə durur. Müəllim müqəddəs varlıqdır. Hətta bizim dövrümüzdə valideyn öz uşaqlarının öhdəsindən gəlmədikdə, müəllimdən xahiş edirdi ki, onu tənbeh edin, lazım olsa cəzalandırın. Yalandan böyük sinif uşağını müəllim bir dəfə itələməklə, əlindən vurmaqla zorakılığa məruz qaldı, uşağı döydü deyilir. Bu düzgün yanaşma deyil”.

Sfera.az xəbər verir ki, bu fikirləri millət vəkili, Müəllimlər İnsitutunun sabiq rektoru Aqiyə Naxçıvanlı Bizim.Media-ya müsahibəsində qeyd edib.

Millət vəkili müəllimlərə qarşı sərgilənən mövqeyi sərt tənqid edib:

"Amma indi bir hadisə baş verən kimi, qəsdən hazırlayırlar, şagird müəllimlərin üzünə durur. O hansı tərbiyəyə malik olan insandır ki, müəlimin üzünə durur, narazılığını bildirir və nəticədə müəllim günahkar olur. Fikirləşmək lazımdır ki, o hansı ailədən gəlib. Belə çıxır ki, valideyn tamamiləmi övladının tərbiyəsi ilə məşğul olmur? Övladının təhsilini də, tərbiyəsini də müəllimin öhdəsinə buraxır. Bununla belə, istəyir ki, müəllim onun uşağına güldən ağır söz deməsin. Bu mümkün olan şey deyil”.

Millət vəkili son vaxtlar məktəblərdə bullinq olaylarına şəxsən şahid olduğunu da qeyd edib. Digər bir problem kimi isə, Aqiyə Naxçıvanlı məktəblə valideynlər arasında əlaqələrin zəif olmasını ön plana çıxarıb. Bununla yanaşı, millət vəkili təhsil proqramlarının ağırlığı səbəbindən uşaqların sağlamlığında ciddi fəsadların yarandığını da bildirib.

"Valideyn məktəbə gedən uşağa bufetdən nə isə almağa pul verir, başqa heç nə ilə maraqlanmır, her şeyi müəllimlərin öhdəsinə buraxırlar. Müəllim də daş deyil ki. O da insandır, onun da səbr kasası daşır. Bizim dövrümüzdə müəllimin üzünə durmaq olardı? İndi müəllimi itələyib yanından keçən var, sözünün üstünə söz qoyan var, müəllimi təhqir edib, lağa qoyanlar var. Belə olmaz. Buna görə də cəmiyyət təhsilə üzünü çevirməlidir, təhsildən yox”, - deyə müsahibimiz qeyd edib.

Millət vəkili Bakının 165 saylı məktəbində baş verən xoşagəlməz olaya və müəllimin cəzalandırılmasına da münasibət bildirib:

"Bu düzgün deyil. Mən anlamıram, burada şagirdin heç bir günahı olmadı? Onun tərbiyəsinin heç bir günahı olmadı? Hər şeydə müəllim günahkar oldu? Başa düşürəm, baxçada dilsiz-ağızsız uşağa əl qaldırmaq olmaz.

Yuxarı sinif uşağını direktor yalandan itələyib, deyirlər "zorakılıq”. Bu zorakılıqdır? Onun ərki çatıb bunu edib. Mən özüm də müəllim olmuşam. Olub ki, şagirdin əlindən də vurmuşam, itələmişəm, başa düşməyəndə cəzalandırmışam. Bunlar olan şeylərdir. Bunu düşmən kimi etmirsən ki. Müəllimin imicini saxlamaq lazımdır”.

Rektor deputatdan etiraf: "Şagirdi vurmuşam, itələmişəm"