Övladına ad qoya bilməyən cütlük boşandı

Çinin Şanxay şəhərində yaşayan bir cütlük, yeni doğulan övladlarına bir il ərzində ad seçə bilmədiklərinə görə boşanmağa qərar verib.

 

Sfera.az  xəbər verir ki, cütlük 2023-cü ildə rəsmi nikaha daxil olub. 2024-cü ildə isə onların oğlan övladı dünyaya gəlib. Lakin valideynlər uşağa hər ikisinin bəyənəcəyi bir ad seçə bilmədikləri üçün ailədə mübahisələr başlayıb. Bu səbəbdən uşaq uzun müddət doğum şəhadətnaməsi olmadan yaşayıb və tibbi yardım almaqda çətinlik çəkib.

 

Nəticədə cütlük boşanmaq üçün məhkəməyə müraciət edib. Məhkəmə müəyyən edib ki, valideynlər uşağa özlərinin seçdiyi adı təkbaşına qeydə aldırmaq üçün ayrı-ayrılıqda xəstəxanaya müraciət etsələr də, bu cəhdlər nəticəsiz qalıb.

 

Hakim bildirib ki, şəxsi münaqişələr səbəbindən sənədlərin rəsmiləşdirilməsini gecikdirməklə valideynlər azyaşlının hüquqlarını pozurlar və məsuliyyətə cəlb olunmalıdırlar. Onlara müəyyən müddət ərzində bütün sənədləri tamamlayaraq uşağa ad vermək tapşırılıb.

 

Lakin bu dəfə də tərəflər sənədlərin orijinalları üzərində mübahisə etməyə başlayıblar. Nəticədə, doğum şəhadətnaməsinin məhkəmədə saxlanılmasına, daha sonra isə anaya verilməsinə qərar verilib. \Axşam.az