Soyuq, küləkli və rütubətli havalarda əhali arasında mövsümi xəstəliklərin, xüsusilə də qrip, soyuqdəymə və müxtəlif allergik reaksiyaların yayılma riski artır. Havanın dəyişkənliyi, qapalı məkanlarda uzun müddət qalma, həmçinin immunitetin zəifləməsi insanların bu xəstəliklərə yoluxma ehtimalını yüksəldir.

Azərbaycan Tibb Universitetinin Farmakologiya kafedrasının dosenti, SSRİ nin ilk antioksidant preparatı Meksidolun həmmüəllifi Aydın Əliyev Sfera.az-a bildirib ki, hazırkı dövrdə profilaktik tədbirlərin görülməsi həm yoluxma hallarının qarşısının alınması, həm də mövcud risklərin azaldılması baxımından mühüm əhəmiyyət daşıyır:

“Təbii ki, payız mövsümü gələndə soyuqdəymə, qrip kimi patalogiyalar ortalığa çıxır. Bunun ilk səbəbi fəsilə uyğun geyinməmək, fəsilə uyğun qidalanmamaqdır. Allah bizə 4 resept verib. Bunlar hər fəsildə nə geyinmək, nə yemək, nə içmək və necə münasibət qurmaqdır. Təəssüflər olsun ki, biz bunlara fikir vermirik. Nəticədə də, bu xəstəliklər meydana çıxır. Fiziki işlə məşğul olan insan tərləyir və buna əhəmiyyət vermir. Bununla da bədənin immun sistemi zəifləyir. Ən çoxda immun sistemi qidalara düzgün fikir vermədik də zəifləyir. Mövsümə uyğun tərəvəz, göy-göyərti yeyilməlidir. Meyvələrdən çox istifadə olunmalıdır. Digər tərəfdən indi ayaq üstü qidalar çoxdur”.

Ekspert əlavə edib ki, insanlar bəzən ancaq quru qidalara üstünlük verirlər. Bu düzgün deyil:

“Mədəmizi 3 yerə bölsək, bir hissəsi su, bir hissəsi hava, digər hissəsi isə qəbul etdiyimiz qidalardır. Bu prinsipə mütləq əməl olunmalıdır. Hər bir insanın özünün sağlamlıq mədəniyyəti olmalıdır. Xəstələnən insan mütləq qoruyucu maskalardan istifadə etməlidir. Xəstələndikdə, həkimə müraciət etmək əsasdır”.

Niyaz Hacıyev
Sfera.az

"Allah bizə 4 resept verib" - Aydın Əliyev