“Neftçi” klubuna qoyulan transfer qadağası futbol ictimaiyyətində şok effekti yaratdı. Paytaxt təmsilçisi Alesio Kurçinin transferinə görə ödəməni gecikdirdiyi üçün FİFA-nın 3 transfer pəncərəsi dönəmi transfer qadağası ilə üzləşib.

Belə ki, ötən ilin yayında Belçika 2-ci liqa klubu “Frank Borains”dən alınan oyunçu üçün tələb olunan vəsait vaxtında ödənilməyib. Bu isə sözügedən klubun şikayət etməsinə və bakılıların cəzalanmasına səbəb olub.

Lüksemburqlu oyunçu “Neftçi” ilə 3 illik müqavilə imzalayıb. Onun transfer haqqı təxminən 200 min avro olub. “Neftçi” klubu rəsmi bəyanat yayaraq qadağanın vəsait ödənildikdən sonra aradan qaldırılacağını açıqlayıb.

Bəs görəsən real vəziyyət necədir? Bu transfer qadağası “Neftçi” üçün hansı təhlükə yarada bilər?

Sfera.az xəbər verir ki, məsələ ilə bağlı futbol eksperti və futbol meneceri kimi də fəaliyyət göstərən Ceyhun Sultanov Bizim.Media-ya açıqlamasında bildirib ki, transfer qadağasının ilkin mərhələdə xəbərdarlıq şəklində verildiyini bildirdi:

“Adətən transfer qadağası o zaman qoyulur ki, klub hansısa futbolçunun transfer haqqını ödəmir və gecikdirir. O zaman futbolçunun əvvəlki klubu FİFA-ya şikayət edir və həmin şikayət əsasında pulu ödəməyən komandaya rəsmi məktub göndərilir.

Bu mərhələdə “Neftçi”yə qoyulan qadağa yalnız xəbərdarlıq xarakterlidir və hələ ki, qüvvəyə minməyib. Vəsait tam ödənildikdən sonra qadağa da aradan qaldırılacaq. Əgər məktub gələndən sonra pul yenə ödənilmirsə, onda artıq transfer qadağası rəsmən qüvvəyə minir.

“Neftçi”yə xəbərdarlıq məktubu göndərilib və bu normaldır. Klub vəsaiti tam ödəsə, transfer qadağası da olmayacaq”.

FİFA-dan “Neftçi”yə XƏBƏRDARLIQ - 200 min avronu tam ödəməsə...