Azərbaycana ən çox idxal olunan avtomobil ehtiyat hissələri hansılardır? - STATİSTİKA

Azərbaycan ötən il avtomobil ehtiyat hissələrinin idxalına 386 milyon dollar ödəyib. 

Sfera.az xəbər verir ki, bu məbləğ ehtiyat hissələrinin idxalında qeydə alınan ən yüksək göstəricidir. Hələ indiyə qədər bir il ərzində avtomobil ehtiyat hissələrinin idxalına bu qədər pul xərclənməmişdi. 

Bəs Azərbaycan avtomobillərin hansı ehtiyat hissələrinin idxalına daha çox pul xərcləyir? 

Ölkəmiz demək olar ki, bütün yeni ehtiyat hissələrinə olan tələbatını idxal malları hesabına ödəyir. Buna görə də avtomobilə aid olan ehtiyat hissələrinin hamısının idxalı həyata keçirilir. Lakin daha çox vəsait bir neçə ehtiyat hissəsinə xərclənir. 

Bunlar arasında ən çox pul təkər şinlərinin alınmasına sərf edilir. Təkər şinlərinin idxalına çəkilən xərc bir ildə 110 milyon dolları ötür.  

2023-cü ildə minik avtomobilləri üçün təzə təkər şinlərinin idxalına 47,3 milyon dollar, yük avtomobilləri və avtobuslar üçün təzə şinlərin idxalına 52 milyon dollar xərclənib. Digər minik avtomobillərinin şinləri üçün 12 milyon dollara yaxın vəsait ayrılıb. 

Azərbaycan minik avtomobillərinin istehsalında istifadə məqsədilə komplekt şəkildə hissələr də alır. Onlara xərclənən pul 38,7 milyon dollar olub.  

Ehtiyat hissələri arasında ən çox pul xərclənən ehtiyat hissələrindən biri də kuzovlardır. Kuzovların idxalı üçün 21,7 milyon dollar xərclənib ki, bunun da 17,6 milyon dolları minik avtomobilləri üçün olan kuzovlara, 4,1 milyon dolları digər avtomobillər üçün olanlara ayrılıb. 

Digər ehtiyat hissələrindən əyləclərə 20,4 milyon dollar, kuzovun digər hissələrinə 19,2 milyon dollar, asma sistemləri və onların hissələrinə (amartizatorlar daxil olmaqla) 11,5 milyon dollar, təkərlərə 10,6 milyon dollar, diferensial körpülərə 9,8 milyon dollar, ilişmələr və onun hissələrinə 7,12 milyon dollar, radiatorlara 7,1 milyon dollar, ötürücü qutulara və onların hissələrinə 7 milyon dollar, sükana aid olan hissələrə 4,3 milyon dollar, bamperlərə 4 milyon dollar xərclənib. 

Bu məlumatlardan göründüyü kimi avtomobillərin hissələri arasında daha çox pul işlək sistemlərə xərclənir. Digərləri hətta baha olsa da onların alınmasına böyük məbləğdə vəsait sərf olunmur. 

Vasif