COVİD-19-un səbəb olduğu yaddaş, təfəkkür və nitq pozğunluqları ömür boyu qala bilər? - Professordan AÇIQLAMA

 

Sfera.az bildirir ki, bunu tibb elmləri doktoru, professor Musa Qəniyev deyib. O qeyd edib ki, bu hal virusun beyinə transformasiya olunaraq, lokal sahələrdə geridönməz nekrotik dəyişikliklər törədib sinir toxumasının ölümünə səbəb olması ilə əlaqələndirilir:

"Bəzi tədqiqatçılar bu pozğunluqların tam bərpa olmasına şübhə ilə yanaşırlar. Bu istiqamətdə ciddi tədqiqatların aparılmasının zərurət olduğunu və bunun üçün xüsusi qrantların ayrılmasını lazım bilirlər. Əslində söylənilənlər elmi həqiqət deyil. COVİD-19-un məlum klinik formasını keçirmiş hər 3 şəxsdən birində yaddaş, düşüncə, təfəkkür və s. kimi pozğunluqlar müşahidə edilir. Bu tamamilə normal bir haldır. Səbəbi, baş beyin qabığının minestik, koqnitiv, nitq, görmə və duyğu mərkəzləri kimi oksigenə mütləq həssaslıq göstərən strukturlarının "Sitokin Fırtınası”nın nəticəsi kimi, nisbi oksigen aclığına məruz qalmasıdır. Başqa sözlə, bu mərkəzlərin sinaptik əlaqə mexanizminin ximizmində baş berən dəyişiklikdir”.

Mütəxəssis bildirib ki, koronavirusu ən ağır keçirmiş insanlarda belə, heç vaxt geridönməz yaddaş, düşüncə, nitq və s. kimi baş beyin pozğunluğu ola bilməz:

"Bu mümkün deyil. Buna görə də, koronavirusa tutularaq "ölüm” xofu yaşayan insanlara, bunları söyləmək ən yaxşı halda nəticəsi düşünülməyən məsuliyyətsizlik və elmsizlikdir. Bəli, COVİD-19 yaddaş, düşüncə, təfəkkür, nitq və s. kimi baş beyin mənşəli pozğunluqlar törədir. Lakin bu pozğunluqlar xəstəlikdən sağaldıqdan 2 həftə sonra bərpa olunmağa başlayır. Xəstəliyin ağırlıq dərəcəsindən asılı olaraq - orta ağır hallarda 1-3 ay, ağır formalarda 3-6 ay, ən ağır formalarda isə, 12-18 aydan sonra tamamilə bərpa olunur”.