Putinə etiraz edənlər polisdən yayınmağın maraqlı üsulunu tapıb: Bu şifrələrlə yazışırlar - FOTO

 

Sfera.az bildirir ki, müharibəyə etiraz  edən rusların bu üsula əl atma səbəbi Putin rejimi olub. Belə ki, cəsarətli Rusiya vətəndaşları hökumətin işğal qərarına qarşı çıxaraq ölkənin hər yerində, xüsusən də Moskvada böyük meydanlarda "Müharibəyə yox” şüarları səsləndiriblər. Nümayişlər zamanı ölkə daxilində minlərlə insan saxlanılıb və polis zorakılığına məruz qalıblar. Rusiya müharibə başlayandan bəri bəzi qadağalar tətbiq edib və onsuz da ciddi nəzarət altında olan sosial mediadan istifadə getdikcə sıxışdırılıb. İnternet senzurasının öhdəsindən gəlmək, sərbəst ünsiyyət qurmaq istəyən ruslar isə çox təəccüblü və əyləncəli həll yolu tapıblar.

Fevralın 24-dən etibarən sosial şəbəkələrdə və mesajlaşma proqramlarında qəfildən qəribə görüntü peyda olmağa başlayıb. Məşhur rus şairi Puşkinin şəkli, 7 rəqəmi və bir neçə cərgədə yeriyən adam emojiləri maraq obyektinə çevrilib. Rusiyanı yaxşı tanıyanlar üçün bu şifrəli yazışmanı deşifrə etmək isə çətin olmayıb.

Ancaq bilməyənlər üçün sözügedən şifrənin mənasını belə ümumiləşdirmək olar: Bu təsvir Moskvanın ən məşhur meydanlarından və görüş nöqtələrindən biri olan Puşkin meydanını simvollaşdırır. 7 rəqəmi də görüş vaxtı üçün bir ipucudur. Çoxlu yeriyən kişi emojilərinin sırası etiraz aksiyasının vizuallaşdırılmasıdır. Bu emoji əslində əvvəlki illərdə digər məsələlərlə bağlı etiraz aksiyalarında iştirak etmək istəyən rusların tez-tez istifadə etdiyi üsuldur. İnsan haqları təşkilatlarının fikrincə, Rusiya hökuməti bu faktdan xəbərdardır və ona görə də əslində bunu parol adlandırmaq olduqca çətindir.

Bəs niyə insanlar hələ də bunu edirlər?

Rusiyada 2014-cü ildən bəri küçələrdə edilən nümayişlər hökumət tərəfindən qadağan edilib. Bu hərəkətlərdə iştirak etmək və saxlanılmaq ilk dəfə üçün 15 sutka, təkrar olunarsa 5 il həbs cəzası deməkdir. İndi isə müharibə şərtlərinə görə yenilənən qanunlar, bu cəzanın 15 ilə qədər uzadılmasına səbəb ola bilər. Belə olan halda, küçələrə çıxıb Putin rejimini tənqid edənlərin hər şeyə rəğmən belə şifrəli mesajlara ehtiyacı var. Çünki aksiya zamanı həmin şəxslərin telefonu polis tərəfindən yoxlanılsa və yazışmalar oxunsa, bunların da cinayət təşkil etmə ehtimalı yüksəkdir. Əslində iş elə bir hal alıb ki, bu mesajlar indi zarafata çevrilib - ancaq Rusiyada iştirak etdiyiniz nümayişləri yazışmadan çıxarıb sosial şəbəkələrdə paylaşsanız, vəziyyət kifayət qədər təhlükəli ola bilər.

Məsələn, bunu edənlərdən biri -  Aleks səhəri gün evindən polis bölməsinə aparılıb və hərəkətlərini bir-bir sadalayan sənədə imza atmağa məcbur edilib. Üstəlik, bir neçə gün həbsdə qalmalı olub.

 

Fevralın 24-də  "Uzun müddətdir ki, şəhərin mərkəzində gözəl gəzintiyə çıxa bilmirəm" deyə tvit atan qadın isə, bu yazıdan bir neçə gün sonra qatara minərkən həbs edilib.

Xatırladaq ki, Rusiyada müharibə başlayandan bəri müharibə əleyhinə nümayişlərdə iştirak etdiyinə görə 14 mindən çox insan saxlanılıb.