“Fit” görünmək istəyi bəzən problem yaradır - Psixoloq

Yay ayları öz istiliyi ilə birlikdə bədənə yönəlmiş baxışları da artırır. Çimərlik mövsümünün başlaması, açıq geyim tərzləri və sosial mediada yayılan “fit” (sağlam və uyğun bədən) görünüşlü  paylaşımlar xüsusilə gənclər arasında ciddi bir psixoloji təzyiqə çevrilib. 

Yay aylarında sosial mediada görünən “ideal bədən” obrazları qadın və gənclərin psixologiyasına necə təsir edir? 

Bununla bağlı Sfera.az-a açıqlama verən psixoloq Gülşən Rüstəmova ideal bədən obrazlarının psixologiyamıza həm müsbət, həm də mənfi təsir göstərə biləcəyindən bəhs edib. 

Onun sözlərinə görə, əgər sosial şəbəkələrdə bədən forması ilə bağlı doğru və real məlumatlar paylaşılırsa, bu, insan üçün bir növ motivasiya rolunu oynayır: 

“Çünki söhbət təkcə xarici görünüşdən deyil, həm də ümumi fiziki və fizioloji sağlamlıqdan gedir. Sağlam bir bədənin özünəməxsus forması var və insan orqanizmi əslində çox mükəmməl quruluşa malikdir. Bu quruluşu qorumaq üçün düzgün qidalanma, həyat tərzi və bədənə sistemli qayğı vacibdir”.

Psixoloq əlavə edib ki, psixoloji amillər də nəzərə alınmalıdır:

“Əgər bir insanın psixoloji narahatlıqları varsa, bu, onun qidalanmasına, ətraf mühitə və öz bədəninə qarşı yanaşmasında özünü göstərir. Sosial şəbəkələrə qarşı qərəzli və ön mühakiməli düşüncə formalaşarsa, artıq burada nə sağlam həyat tərzindən, nə də balanslı düşüncədən bəhs etmək olar. Odur ki, əvvəlcə sağlam düşüncə tərzi formalaşmalıdır ki, onun ardınca sağlam ruh və bədənə sahib olmaq mümkün olsun. Bu mənada “ideal bədən” anlayışındansa, “sağlam bədən” ifadəsini işlətmək daha məqsədəuyğundur. Əgər dünyaya baxış bucağımız sağlam və obyektivdirsə, qarşılaşdığımız məlumatları təhlil edərək düzgün nəticələr çıxara bilərik. Bəli, sosial şəbəkələrdə pafoslu və reallıqdan uzaq informasiyalar yetərincədir, lakin əgər biz sağlam təfəkkür sahibiyiksə, həmin informasiyaları süzgəcdən keçirməyi bacarırıq”.

G.Rüstəmova qeyd edib ki, ümumilikdə informasiya axını çox genişdir və biz gündəlik həyatda müxtəlif məlumatlara məruz qalırıq:

“Beynimiz bu informasiyaları analiz edərək onları müəyyən kateqoriyalara ayırır. Sağlam psixologiyaya sahib olsaq, bu məlumatları düzgün qəbul edə və ehtiyacımız olan formada istifadə edə bilərik. Nəticədə, insan özünə daha çox diqqət ayırar, öz inkişafı ilə daha effektiv şəkildə məşğul ola bilər”.

Fidan Hacızadə
Sfera.az