Musiqi yayım platforması “Spotify”, süni intellektlə yaradılmış saxta mahnıların ölmüş sənətçilərin rəsmi səhifələrində paylaşılması ilə bağlı qalmaqalla gündəmə gəlib. İddialara görə, bu mahnılar nə mərhum sənətçilərin varislərinin, nə də prodüser şirkətlərinin icazəsi olmadan yayımlanıb.

Sfera.az xarici mediaya istinadən xəbər verir ki, hadisə ilk olaraq 1989-cu ildə vəfat edən məşhur kantri ifaçısı Blaze Foley ilə bağlı üzə çıxıb.

Onun rəsmi “Spotify” səhifəsində “Together” adlı yeni bir mahnı yerləşdirilib. Sakit və yavaş ritmdə səslənən bu mahnı Foleynin musiqi üslubuna uyğun gəlməsə də, onun adından təqdim olunub. Mahnının üz qabığında isə Foleyə bənzəməyən bir şəxsin süni intellekt tərəfindən yaradılmış təsviri yer alıb.

Blaze Foleynin musiqilərinin yayım hüquqlarına sahib olan “Lost Art Records” şirkətinin sahibi Kreyq Mak Donald məsələ ilə bağlı açıqlama verib. O bildirib ki, bu mahnı Foleyə aid deyil və onun üslubunu əks etdirmir:

“Bu, sadəcə bir süni intellekt robotunun yaratdığı saxta mahnıdır. Blaze ilə heç bir əlaqəsi yoxdur”.

Spotify isə məsələ ilə bağlı reaksiya verərək “Together” mahnısının “Aldadıcı Məzmun” siyasətini pozduğu üçün silindiyini açıqlayıb. Qeyd olunub ki, parçanın yayımçısı “TikTok”a məxsus “SoundOn” platforması olub.

Məsələnin təkcə Blaze Foley ilə məhdudlaşmadığı bildirilir. “Syntax Error” adlı bir şirkət tərəfindən yükləndiyi iddia edilən süni intellekt məhsulu digər mahnılar da aşkar edilib. Bunlar arasında “Grammy” mükafatçısı Quy Klark və müğənni Dan Berkin də adından yayımlanan saxta mahnılar yer alır.

Kreyq Mak Donald isə problemi kökündən həll edəcək bir təkliflə çıxış edib:

“Spotify yalnız sənətçiyə və səhifənin rəsmi idarəçisinə məxsus olan, təsdiqlənmiş mahnıların paylaşılmasına icazə verməlidir”.

O, tanınmış sənətçilərin pərəstişkarlarının saxtakarlığı anlaya biləcəyini, lakin tanımayan dinləyicilərin aldadılacağını vurğulayıb.

Bəsti Rəfizadə
Sfera.az

Növbəti süni intellekt saxtakarlığı: Ölmüş sənətçilərin mahnıları yayımlanır