Vergilər dövlətlərin gəlir mənbələrindən biri olsa da, tarix boyu bəzi vergilər sadəcə iqtisadi deyil, həm də bir qədər qəribə və gülməli olub. Müxtəlif dövrlərdə tətbiq edilən bəzi vergilər bugünkü baxışla ağıla sığmaz görünür.

Sfera.az dünyanın ən qeyri-adi vergilərindən bəzilərini təqdim edir.

Saqqal vergisi (1698, Rusiya)

Çar I Pyotr Rusiyanı qərbləşdirmək məqsədilə kişi saqqallarını hədəf aldı. 1698-ci ildən başlayaraq kişilərin saqqal saxlaması üçün xüsusi vergi ödəməsi tələb olunurdu. Saqqal vergisi ödəyənlərə kiçik bir medal verilirdi ki, bu da onların qanuni saqqal daşıyıcısı olduğunu göstərirdi.

Subaylıq vergisi (1821, ABŞ)

ABŞ-də bəzi ştatlarda 19-cu əsrdə subaylara qarşı xüsusi vergi tətbiq edilirdi. Məqsəd evliliyi təşviq etmək və ailə institutunu gücləndirmək idi. Massaçuset ştatında, məsələn, 1821-ci ildə müəyyən yaşdan sonra evlənməyən kişilər əlavə vergi ödəməli idilər.

Sabun vergisi (1712, İngiltərə)

İngiltərədə təmizlik belə vergi obyektinə çevrilmişdi. 1712-ci ildə sabuna vergi qoyuldu. Bu vergi o qədər yüksək idi ki, sadə insanlar sabun almaqda çətinlik çəkirdi. Vergi 1835-ci ildə ləğv olundu.

Kart oyunu vergisi (1588, İngiltərə)

1588-ci ildə İngiltərə hökuməti kart oyunlarına marağı azaldıb gəlir toplamaq məqsədilə kartlara vergi tətbiq etdi. Oyuncular yalnız rəsmi şəkildə möhürlənmiş və vergisi ödənmiş kart dəstlərindən istifadə edə bilərdilər.

Divar kağızı vergisi (1712, İngiltərə)

Evin içini bəzəmək də əlavə xərcə səbəb olurdu. 1712-ci ildə divar kağızı istifadə edənlər bu məhsula görə əlavə vergi ödəyirdilər. İnsanlar bu vergidən yayınmaq üçün ağ divar kağızı alıb onu evdə özləri bəzəməyə başlamışdılar.

Pəncərə vergisi (1696, İngiltərə)

Bu qəribə verginin tələbinə əsasən evlərdəki pəncərə sayı çox olduqca mənzil sahibi xüsusi vergi ödəməli idi. Nəticədə insanlar evlərindəki pəncərələri kərpiclə örtməyə başladılar. Bu, sonradan ciddi sağlamlıq problemlərinə, o cümlədən D vitamini çatışmazlığına yol açdı. Vergi 1851-ci ildə ləğv olundu.

Bu tarixi nümunələr göstərir ki, vergi siyasəti bəzən sadəcə iqtisadi yox, həm də sosial və mədəni dəyişikliklərin aləti olub. Ancaq bəzi qərarlar həqiqətən də gülməli və bir qədər absurddur.

Firuzə Əliyeva
Sfera.az

Dünyanın ən qəribə vergiləri – Sabun, subaylıq, saqqal…