Asteroid Ay ilə toqquşacaq - Onun Yerə düşmə ehtimalı da var
Yer üçün bir zamanlar təhlükə kimi qiymətləndirilən “2024 YR4” adlı asteroidin trayektoriyası yenidən hesablanıb. Alimlər asteroidin 2032-ci ildə Ay ilə toqquşma ehtimalının 4,3 faiz olduğunu bildiriblər.
Sfera.az xarici mediaya istinadən xəbər verir ki, 2024-cü ilin dekabr ayında kəşf edilən və diametri 53-67 metr arasında olan göy cismi, NASA-nın “James Webb Kosmik Teleskop”u vasitəsilə yenidən müşahidə olunub.
ABŞ-nin Jonn Hopkins Tətbiqi Fizika Laboratoriyasının mütəxəssisləri əldə olunan yeni məlumatlarla asteroidin orbitini yenidən təhlil ediblər.
Hesablamalar asteroidin Yer ilə toqquşma riskini tamamilə aradan qaldırsa da, Ay ilə toqquşma ehtimalını əvvəlki 3,8 faizdən 4,3 faizə yüksəldib. Bu, Yer üçün mövcud təhlükəni ortadan qaldırır, lakin elmi baxımdan diqqəti mümkün Ay toqquşmasına yönəldir.
Mütəxəssislərin fikrincə, asteroidin Aya düşməsi ehtimalı reallaşsa belə, bu hadisə Yer üçün heç bir təhlükə yaratmayacaq və Ayın orbitində ciddi dəyişikliklərə səbəb olmayacaq.
Əksinə, belə bir toqquşma alimlər üçün nadir müşahidə imkanı hesab olunur. Mümkün toqquşma baş verərsə, bu, ilk dəfə asteroidin Ay ilə toqquşmasının birbaşa müşahidəsi olacaq və planet müdafiə strategiyalarının inkişafı üçün önəmli məlumatlar təmin edəcək.
Asteroidin Ay ilə toqquşması ehtimalı, həmçinin gələcəkdə bənzər səma cisimlərinə qarşı daha dəqiq təhlil və müdaxilə imkanları yaradacaq.
Bəsti Rəfizadə
Sfera.az
