"Evdə eyni vaxtda bir neçə cihazı işlətməyin" - Mütəxəsisdən vacib tövsiyə

Havaların isinməsi ilə əlaqədar olaraq yanğın təhlükəsi artır. Təhlükəsizlik mütəxəssisləri həm fərdi yaşayış evlərində, həm də ictimai və sənaye obyektlərində yanğın təhlükəsizliyi tədbirlərinin gücləndirilməsinin vacibliyini vurğulayırlar.

Məsələ ilə bağlı Sfera.az-a açıqlama verən, təhlükəsizlik eksperti Elmar Nurəliyev bildirir ki, yanğın təhlükəsizliyinə laqeyd yanaşmaq acı nəticələrə səbəb ola bilər. 

Onun sözlərinə görə, təyinatından asılı olmayaraq bütün obyektlərdə yanğın təhlükəsizliyi məsələsinə ciddi yanaşmaq lazımdır.

Ekspert qeyd edir ki, yanğın təhlükəsizliyi üçün zəruri avadanlıqların quraşdırılması və onların daim saz vəziyyətdə saxlanılması olduqca vacibdir:

“Obyektlər ilkin yanğınsöndürmə vasitələri, yanğın xəbərdaredici siqnalizasiya sistemləri, ehtiyat su çənləri, yanğın hidrantları ilə təmin olunmalı və bu vasitələrin hamısı işlək vəziyyətdə saxlanılmalıdır. Bu, qanunvericilikdə də əksini tapıb”.

Yanğınların səbəblərinə toxunan ekspert bildirir ki, statistika üzrə yanğınların əksəriyyəti məhz elektriklə bağlı nasazlıqlar nəticəsində baş verir:

“Yanğınların böyük əksəriyyəti elektrik qısaqapanmasının payına düşür. Ona görə də elektrik təsərrüfatının saz vəziyyətdə olmasına diqqət yetirilməlidir. Elektrik şəbəkəsi normadan artıq yüklənməməlidir. Bu, naqillərin qızmasına, qısaqapanmaya və alışmaya səbəb olur”.

E.Nurəliyevin sözlərinə görə, bir çox hallarda evdə eyni anda bir neçə elektrik cihazının işləməsi riskləri artırır:

“Əgər evdə eyni vaxtda qabyuyan, paltaryuyan maşın, kondisioner, televizor və digər cihazlar işləyirsə, üstəlik elektrik şəbəkəsi də saz deyilsə, yaxud keyfiyyətsiz naqillərdən istifadə olunubsa, bu, artıq qızma və nəticədə yanğına səbəb ola bilər”.

Ekspert iş yerlərində də təhlükəsizlik tədbirlərinin unudulmamalı olduğunu vurğulayır:

“İş yerlərində də yanğın təhlükəsinə qarşı davamlı və planlı tədbirlər görülməlidir. Yoxlamalar aparılmalı, əməkdaşlara mütəmadi təlimlər keçirilməlidir”.
Əlavə olaraq E.Nurəliyev tövsiyələrini də bildirib: "Hər mənzildə və obyektdə işlək vəziyyətdə ən azı bir yanğınsöndürən balon olmalıdır. Elektrik cihazları istifadədən sonra şəbəkədən çıxarılmalıdır. Balkon və pilləkənlərdə tezalışan materiallar saxlanmamalıdır"

Mütəxəssis bildirir ki, bu cür sadə, amma vacib qaydalara əməl etməklə bir çox faciələrin qarşısını almaq mümkündür.

Bəsti Rəfizadə
Sfera.az