“WhatsApp”dan yenilik - Silinmiş mesajlar...
“WhatsApp” istifadəçi təcrübəsini və məxfiliyi daha da təkmilləşdirmək üçün yeni funksiyalar üzərində çalışır.
Sfera.az “NTV”nəşrinə istinadən xəbər verir ki, “Android” və “iOS” sistemlərində sınaqdan keçirilən iki yenilik xüsusilə qrup söhbətlərində nizam-intizamı artırmağı və mesajların silinməsi prosesini daha effektiv hala gətirməyi hədəfləyir.
“WhatsApp”ın “Android” üçün 2.25.7.7 beta versiyasında test edilən ilk xüsusiyyət mesajlara cavab sistemini yenidən dizayn edir. Yeni funksiyaya görə, cavablar artıq birbaşa həmin mesaja bağlı şəkildə, alt başlıq formasında toplanacaq. Bu da istifadəçilərə qarmaqarışıq mesaj axınında müəyyən mövzuya aid cavabları asanlıqla izləmək imkanı yaradacaq. Xüsusilə çox iştirakçılı qrup çatlarında bu sistem vacib elanların və müzakirələrin diqqətdən yayınmasının qarşısını alacaq.
“iOS” cihazları üçün 25.12.73 versiyasında sınaqdan keçirilən digər yenilik isə mesajların silinməsi funksiyasını daha məntiqli edir. İndi söhbətdən silinmiş bir mesaja sitat gətirilmiş cavablar da avtomatik şəkildə silinəcək. Beləliklə, əvvəllər orijinal mesaj silindikdən sonra belə cavablarda görünən sitatlar artıq ekranda qalmayacaq.
Bu iki yeniliyin yaxın zamanda bütün istifadəçilər üçün istifadəyə verilməsi gözlənilir və bu dəyişikliklərin “WhatsApp” danışıqlarını daha funksional və məxfi hala gətirəcəyi bildirilir.
Fidan Hacızadə
