"OpenAI" yeni süni intellekt modelini təqdim etdi

Süni intellekt sahəsində ən böyük şirkətlərdən olan ABŞ-nin "OpenAI" şirkəti süni intellekt modeli "GPT-4.1"i rəsmi olaraq ictimaiyyətə təqdim edib. Şirkət bu yeni model ilə süni intellekt texnologiyalarında yeni bir dövrə start verib.

Sfera.az xarici mediaya istinadən xəbər verir ki, "GPT-4.1" əvvəlki versiya olan "GPT-4o" ilə müqayisədə həm daha çox konteksti emal edə bilməsi, həm də daha səmərəli və güclü işləmə xüsusiyyətləri ilə seçilir. Model, xüsusilə kod yazma və mürəkkəb tapşırıqları anlama sahəsində daha yüksək səmərəlilik nümayiş etdirir.

Yeni modelin ən çox diqqət çəkən cəhətlərindən biri isə 1 milyon məlumatı eyni anda emal edə bilmə qabiliyyətidir. Bu göstərici, əvvəlki "GPT-4o" modelində 128 min idi. "GPT-4.1" həmçinin uzun mətnləri və mürəkkəb strukturlu məlumatları daha dəqiq təhlil etmək və cavablandırmaq imkanı yaradır.

Modelin təqdimatı ilə yanaşı, "ChatGPT" platformasında hazırda istifadə edilən "GPT-4" modelinin 30 aprel tarixində deaktiv ediləcəyi elan edilib. Bundan əlavə, "API" vasitəsilə təqdim olunan "GPT-4.5" modelinin önizləmə versiyasının isə 14 iyulda dayandırılacağı bildirilib.

Yeni "GPT-4.1" modeli süni intellektin tətbiq sahələrində daha sabit, uyğun və güclü nəticələr təqdim etməklə sahədə inqilabi dəyişikliklərə yol açacağı gözlənilir.

Bəsti Rəfizadə