Ayda tikinti aparmaq mümkün olacaq - Sınaq uğurlu alınıb - FOTO
Hindistan Elm İnstitutunun (IISc) tədqiqatçıları Ayda gələcək yaşayış məntəqələrinin tikintisi üçün inqilabi bir metod üzərində işləyirlər. Onlar Ay səthindəki toz və qaya parçalarından ibarət olan regolitinin tikinti materialı kimi istifadəsini nəzərdən keçirir və bu məqsədlə bakteriyalardan yararlanmağı planlaşdırırlar.
Sfera.az "En Son Haber"ə istinadən xəbər verir ki, Ayda yaşayış sahələrinin yaradılması üçün istifadə ediləcək materialların Yer kürəsindən daşınması həm texniki, həm də maliyyə baxımından çətinliklər yaradır.
Bu səbəbdən, IISc mütəxəssisləri daha sərfəli və davamlı alternativlər üzərində çalışırlar. Onlar bakteriyalardan istifadə edərək Ay reqoliti ilə möhkəm kərpiclər hazırlamağa nail olublar.
Tədqiqatçılar "Sporosarcina pasteurii" adlı bakteriyanı quar saqqızı və reqolit imitasiya materialı ilə birləşdirərək süni zədə almış Ay kərpiclərini bərpa etməyə çalışıblar. Bakteriyalar bir neçə gün ərzində kalsium karbonat istehsal edərək çatlaqları effektiv şəkildə doldurublar. Bu proses nəticəsində kərpiclər ilkin möhkəmliyi 28%-dən 54%-dək bərpa olunub.
Alimlər bu bioloji təmir üsulunu Ayda tikililərin saxlanması üçün dayanıqlı həll kimi qiymətləndirirlər. Bu texnologiya, eyni zamanda, təmir materiallarının Yer kürəsindən kosmosa daşınması ehtiyacını da minimuma endirə bilər.
Lakin hələ də cavabsız suallar mövcuddur. Alimlər bakteriyaların kosmosun sərt və dəyişkən şəraitində necə davranacağını öyrənmək istəyirlər. Bunun üçün 2026-cı ildə həyata keçirilməsi planlaşdırılan Hindistanın "Gaganyaan" missiyası çərçivəsində "Sporosarcina pasteurii" bakteriyasının nümunəsinin kosmosa göndərilməsi nəzərdə tutulur. Bu təcrübə bakteriyaların dünya xarici şəraitdəki fəaliyyəti ilə bağlı mühüm məlumatlar təqdim edə bilər.
Bəsti Rəfizadə
