Yaponlar xarici turistləri xoşlamırlar? - Bu səhvləri etməyin

Yaponiya qədim ənənələri, dünya şöhrətli mətbəxi və yaşam tərzləri ilə turistlərin ən çox ziyarət etdiyi ölkələrdən biridir. 2024-cü ildə 36 milyondan çox xarici turist Yaponiyanı ziyarət edib. Lakin bu ölkəyə səfər etməyi planlaşdıranlar bəzi qaydaları bilməlidirlər.

Sfera.az xəbər verir ki, Yaponiyanı ziyarət edən turistlərin əksəriyyəti yerli mədəniyyətə hörmət etsə də, bəziləri bilmədən sosial normaları poza bilər.

Bu isə yaponlar arasında narahatlıq yaradır. Son illərdə turist axınının artması bəzi problemlərə səbəb olub. Məsələn, 2023-cü ildə bir Yapon mağazası xarici turistlərin ətraf mühiti çirkləndirdiyini və işçilərə kobud davrandığını bildirib. Ötən il isə Fudzi dağının mənzərəsini bağlayan 20 metr hündürlüyündə bir sədd tikilib.
Yaponlar ənənələrə, nizam-intizama və səliqəyə böyük önəm verirlər. Turistlərin bu ölkədə yol verməməli olduğu üç əsas səhv davranış bunlardır:

- Yolda yeyib-içmək;

Yaponiyada gəzərkən yemək yemək və ya içki içmək hörmətsizlik kimi qəbul edilir. Bu adət yapon mədəniyyətində “tabearuki” adlanır və yeməyə qarşı laqeyd münasibət kimi qiymətləndirilir.
Turistlərə qəlyanaltılarını park kimi sakit bir yerdə oturaraq yemələri tövsiyə olunur. Yemək festivalları və bazarlarda ayaq üstə yemək məqbul sayılsa da, başqalarına mane olmamaq üçün bir kənara çəkilmək nəzakətli davranış hesab edilir.

- Bəxşiş vermək;

Qərb ölkələrindən fərqli olaraq, Yaponiyada bəxşiş vermək adi hal deyil və hətta bəzi hallarda kobudluq kimi qəbul edilə bilər. Restoranlar, otellər və taksilərdə əlavə pul vermək ehtiyac duyulmayan bir davranış hesab olunur.

Bizim üçün bu nəzakət göstəricisi olsa da, yaponlar yaxşı xidmətin artıq ödənilən məbləğin içində olduğunu düşünürlər. Bununla belə, bəzi istisnalar var. Məsələn, xüsusi tur bələdçiləri, tərcüməçilər və ənənəvi Yapon qonaq evlərində (ryokan) işləyənlər bəxşiş qəbul edə bilərlər.

Yaponiyada bəxşiş vermək lazım gəldikdə, pulu birbaşa uzatmaq əvəzinə bir zərfə qoyaraq təqdim etmək daha hörmətli hesab edilir.

- İctimai nəqliyyatda səs-küy salmaq;

Yaponiyada qatar və avtobuslar sakitliyi və nizamlılığı ilə seçilir. İctimai nəqliyyatda yüksək səslə danışan və ya telefonda danışan turistlər, yerli sərnişinlər tərəfindən narazılıqla qarşılanır.

Yapon mədəniyyətində ictimai nəqliyyat şəxsi düşüncə və istirahət vaxtı kimi qəbul edilir. Buna görə də telefonda danışmaq və ya yüksək səslə musiqi dinləmək yaxşı qarşılanmır.

Yaponiyaya səyahət edərkən bu qaydalara əməl etməklə həm yerli əhalinin hörmətini qazana, həm də daha xoş bir təcrübə yaşaya bilərsiniz.

Bəsti Rəfizadə