Çindən yeni ixtira - 100 km uzaqlıqdan...
Çin 100 kilometr uzaqlıqdan millimetr dəqiqliyində görüntü əldə edən yeni casus texnologiya hazırlayıb.
Sfera.az xarici mediaya istinadən xəbər verir ki, Çin Elmlər Akademiyasının Kosmik Məlumat Tədqiqatları İnstitutu tərəfindən hazırlanan yeni optik görüntüləmə texnologiyası qlobal müşahidə standartlarını dəyişə bilər. Bu texnologiya 100 kilometr uzaqlıqdan belə millimetr səviyyəsində görüntü dəqiqliyi təmin edir.
Yeni lazer görüntüləmə sistemi mövcud linza əsaslı casus kameralardan 100 dəfə daha yüksək görüntü keyfiyyətinə malikdir. Bu texnologiya sayəsində Çin hökuməti xarici hərbi peykləri və yerüstü müdafiə obyektlərini daha əvvəl görünməmiş detallarla izləyə bilər.
Sistemin sınaqları Çin ərazisində yerləşən Çinhay gölü üzərində aparılıb. 101,8 kilometr məsafədən aparılan test zamanı cihaz gölün qarşı tərəfindəki obyektləri cəmi 1,7 millimetrlik detallarla göstərə bilib.
Mütəxəssislər bu texnologiyanın həm hərbi, həm də strateji müşahidə sahələrində inqilabi imkanlar yaradacağını bildirirlər.
Fidan Hacızadə
